AQSh prezıdenti Donald Tramp pen Reseı prezıdenti Vladımır Pýtın ekinshi ret telefon arqyly sóılesti, dep habarlaıdy "Adyrna" ulttyq portaly BBC News-ke silteme jasap.
Kreml málimetinshe, olar Ýkraınadaǵy qaqtyǵysty retteý joldaryn talqylap, ortaq kúsh-jigerdi jalǵastyrýǵa nıetti ekenin rastaǵan.
Pýtın Tramptyń Reseı men Ýkraınanyń 30 kún boıy energetıkalyq ınfraqurylym nysandaryna shabýyl jasamaý týraly usynysyn qoldap, bul jóninde áskerı kúshterge buıryq bergen. Sondaı-aq, ol 19 naýryzda 175 áskerı tutqynnyń aıyrbastalatynyn habarlady.
Kremldiń málimdemesinde taraptar Ýkraına máselesin retteý úshin amerıkalyq jáne reseılik sarapshylar toptaryn qurýǵa keliskeni aıtyldy.
Al Aq úıdiń qysqa málimdemesinde eki el beıbitshilikke qol jetkizý úshin atysty toqtatý jóninde kelissózderdi bastaýdy uıǵarǵany kórsetilgen.
"Kóshbasshylar beıbitshilikke umtylý eń aldymen energetıka men ınfraqurylym salasyndaǵy atysty toqtatýdan bastalatynyna, sondaı-aq Qara teńizde atysty toqtatý jónindegi tehnıkalyq kelissózderdi júrgizýge, atysty tolyq toqtatýǵa jáne turaqty beıbitshilik ornatýǵa kelisti. Bul kelissózder Taıaý Shyǵysta dereý bastalady", - delingen Aq úıdiń qorytyndy málimdemesinde.
Sonymen qatar, Tramp pen Pýtın strategııalyq qarýlardyń taralýyn toqtatý, Taıaý Shyǵystaǵy yntymaqtastyq jáne Irannyń ıadrolyq qaýpine qatysty máselelerdi talqylaǵan.
Tramp óziniń Truth Social áleýmettik jelisinde Pýtınmen áńgimesin «óte jaqsy jáne nátıjeli» dep sıpattap, atysty tolyq toqtatý úshin jedel jumys isteıtinin málimdedi.
AQSh pen Reseı prezıdentteriniń telefon arqyly sóılesýinen keıin Ýkraına prezıdenti Vladımır Zelenskıı bul kelissózderdiń egjeı-tegjeıin AQSh tarapynan kútip otyrǵanyn málimdedi.
Helsınkıde jýrnalısterge bergen suhbatynda Zelenskıı Reseıdiń energetıkalyq ınfraqurylymyna shabýyl jasaýdy toqtatý usynysyn qoldaıtynyn, biraq Tramp pen Pýtınniń naqty ne talqylaǵanyn bilgisi keletinin aıtty.
Keıinirek ol Reseıdiń Ýkraınadaǵy azamattyq ınfraqurylymǵa shabýyldaryn jalǵastyryp jatqanyn atap ótti.
«Búgin Pýtın atysty tolyq toqtatý týraly usynystan bas tartty. Álem de Pýtınniń soǵysty sozýǵa kez kelgen áreketin qabyldamaýy kerek», – dedi Zelenskıı.
