اقش-تىڭ پرەزيدەنتى دونالد ترامپ اكىمشىلىگى شەتەلدىك اۋديتورياعا حابار تاراتاتىن امەريكالىق بۇقارالىق اقپارات قۇرالدارىنىڭ جۇزدەگەن قىزمەتكەرىن اقىسىز دەمالىسقا جىبەردى. بۇل ەڭ الدىمەن "امەريكا داۋىسى" مەن "ازاتتىق راديوسى" سەكىلدى مەديارەسۋرستاردىڭ قىزمەتكەرلەرىنە اسەر ەتتى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
"امەريكا داۋىسى", "ازات ازيا راديوسى" (RFA) جانە "ازات ەۋروپا/ازاتتىق راديوسىنىڭ" (RFE/RL) جۋرناليستەرى مەن باسقا دا قىزمەتكەرلەرىنە ەلەكتروندىق پوشتا ارقىلى ءتيىستى حابارلامالار جىبەرىلگەن. وندا ولاردىڭ جۇمىس كەڭسەلەرىنە كىرۋگە رۇقساتى بولمايتىنى، سونداي-اق جۋرناليستىك كۋالىكتەرى مەن جۇمىس جابدىقتارىن تاپسىرۋى كەرەكتىگى ايتىلعان.
بۇل جاعداي ترامپتىڭ اقش ۇكىمەتىندەگى جەتى تاۋەلسىز فەدەرالدىق اگەنتتىكتىڭ جۇمىسىن ايتارلىقتاي قىسقارتۋ تۋرالى جارلىعىنا بايلانىستى ورىن الدى. اقش پرەزيدەنتى اسىرەسە اقش-تىڭ عالامدىق مەديا اگەنتتىگىنىڭ قىزمەتكەرلەر سانىن بارىنشا ازايتۋدى بۇيىردى. بۇل اگەنتتىك جوعارىدا اتالعان مەدياكومپانيالاردى قارجىلاندىرىپ كەلگەن.
"ازات ەۋروپا/ازاتتىق راديوسىنىڭ" باسشىسى ستيۆەن كاپۋستىڭ ايتۋىنشا، قارجىلاندىرۋ توقتاتىلعاننان كەيىن بۇل مەديارەسۋرستىڭ 75 جىلدىق قىزمەتى توقتاۋى مۇمكىن.
"ازاتتىق راديوسى مەن ازات ەۋروپاعا قارجىلاندىرۋدىڭ توقتاتىلۋى – امەريكانىڭ قارسىلاستارىنا جاسالعان ۇلكەن سىيلىق. يران اياتوللالارى، قىتاي كوممۋنيستىك باسشىلارى، ماسكەۋ مەن مينسكىدەگى اۆتوكراتتار قۋاناتىن ارەكەت. ءبىزسىز الەمنىڭ جابىق قوعامدارىندا ءومىر سۇرەتىن 50 ميلليونعا جۋىق ادام سەنىمدى اقپارات كوزىنەن ايىرىلادى", – دەدى كاپۋس.
RFE/RL دەرەكتەرىنە سايكەس، 2017 جىلى راديودا 400-دەن استام شتاتتىق جۋرناليست، 700-دەن استام فريلانسەر جۇمىس ىستەگەن. 2023 جىلى مەدياكومپانيا ۆيلنيۋس پەن ريگادا جاڭا كەڭسەلەر اشىپ، بەلورۋس جانە ورىس تىلدەرىندە حابار تاراتا باستاعان.
اتالعان مەدياكومپانيالار اقش كونگرەسى ارقىلى قارجىلاندىرىلعانىمەن، ولاردىڭ رەداكتسيالىق ساياساتى تاۋەلسىز بولىپ قالا بەرگەن. الايدا ترامپ پرەزيدەنتتىگى كەزىندە بۇل باق-تارعا قىسىم كۇشەيىپ، ولاردى ءوزىنىڭ ساياساتىن قولداۋعا ماجبۇرلەۋگە تىرىستى. بىرقاتار اقپارات اگەنتتىكتەرىنە اق ۇيگە كىرۋگە تىيىم سالۋ دا سول شارالاردىڭ ءبىرى بولعان.
