AQSh-tyń prezıdenti Donald Tramp ákimshiligi sheteldik aýdıtorııaǵa habar taratatyn amerıkalyq buqaralyq aqparat quraldarynyń júzdegen qyzmetkerin aqysyz demalysqa jiberdi. Bul eń aldymen "Amerıka daýysy" men "Azattyq radıosy" sekildi medıaresýrstardyń qyzmetkerlerine áser etti, dep habarlaıdy "Adyrna" ulttyq portaly DW-ge silteme jasap.
"Amerıka daýysy", "Azat Azııa radıosy" (RFA) jáne "Azat Eýropa/Azattyq radıosynyń" (RFE/RL) jýrnalısteri men basqa da qyzmetkerlerine elektrondyq poshta arqyly tıisti habarlamalar jiberilgen. Onda olardyń jumys keńselerine kirýge ruqsaty bolmaıtyny, sondaı-aq jýrnalıstik kýálikteri men jumys jabdyqtaryn tapsyrýy kerektigi aıtylǵan.
Bul jaǵdaı Tramptyń AQSh úkimetindegi jeti táýelsiz federaldyq agenttiktiń jumysyn aıtarlyqtaı qysqartý týraly jarlyǵyna baılanysty oryn aldy. AQSh prezıdenti ásirese AQSh-tyń Ǵalamdyq medıa agenttiginiń qyzmetkerler sanyn barynsha azaıtýdy buıyrdy. Bul agenttik joǵaryda atalǵan medıakompanııalardy qarjylandyryp kelgen.
"Azat Eýropa/Azattyq radıosynyń" basshysy Stıven Kapýstyń aıtýynsha, qarjylandyrý toqtatylǵannan keıin bul medıaresýrstyń 75 jyldyq qyzmeti toqtaýy múmkin.
"Azattyq radıosy men Azat Eýropaǵa qarjylandyrýdyń toqtatylýy – Amerıkanyń qarsylastaryna jasalǵan úlken syılyq. Iran aıatollalary, Qytaı kommýnıstik basshylary, Máskeý men Mınskidegi avtokrattar qýanatyn áreket. Bizsiz álemniń jabyq qoǵamdarynda ómir súretin 50 mıllıonǵa jýyq adam senimdi aqparat kózinen aıyrylady", – dedi Kapýs.
RFE/RL derekterine sáıkes, 2017 jyly radıoda 400-den astam shtattyq jýrnalıst, 700-den astam frılanser jumys istegen. 2023 jyly medıakompanııa Vılnıýs pen Rıgada jańa keńseler ashyp, belorýs jáne orys tilderinde habar tarata bastaǵan.
Atalǵan medıakompanııalar AQSh Kongresi arqyly qarjylandyrylǵanymen, olardyń redakııalyq saıasaty táýelsiz bolyp qala bergen. Alaıda Tramp prezıdenttigi kezinde bul BAQ-tarǵa qysym kúsheıip, olardy óziniń saıasatyn qoldaýǵa májbúrleýge tyrysty. Birqatar aqparat agenttikterine Aq úıge kirýge tyıym salý da sol sharalardyń biri bolǵan.
