14 ناۋرىز كۇنى فۋكۋوك – استانا باعىتى بويىنشا ۇشقان ۇشاق قۇسپەن سوقتىعىسقانى تۋرالى اقپارات جەلىدە تارادى، دەپ حابارلايدى "ادىرنا" ۇلتتىق پورتالى Tengri Travel-گە سىلتەمە جاساپ.
Threads الەۋمەتتىك جەلىسىندە قازاقستاندىق جولاۋشى وقيعا تۋرالى جازعان.
"قازاقستاننان ۆەتنامعا ۇشۋ قيىن ءارى ۇزاق، اسىرەسە بالالارمەن بىرگە. ال بۇل جولى شىمكەنتكە قوندىق. وعان قوسا، ءبىزدىڭ ۇشاققا قۇس سوعىلدى. دەگەنمەن، پيلوتتارعا ۇلكەن العىس – ولار ۇشاقتى ەش قيىندىقسىز قوندىردى!" - دەپ جازعان جولاۋشى.
"فۋكۋوك – استانا باعىتىنداعى VSV5355 رەيسى شىمكەنتكە قارسى جەلدىڭ كۇشەيۋىنە بايلانىستى قوسىمشا جانارماي قۇيۋ ءۇشىن قوندى. وسى كەزدە ەكيپاج ۇشاققا قۇس سوعىلعانىن انىقتادى. اۋە كومپانياسى وقيعانىڭ سالدارىن جويۋ ءۇشىن قوسىمشا اۋە كەمەسىن جىبەردى. جولاۋشىلارعا ىستىق تاماق بەرىلىپ، ولار ۇشۋدى كۇتۋ كەزىندە قوناق ۇيلەرگە ورنالاستىرىلدى. جولاۋشىلاردىڭ قاۋىپسىزدىگى – ءبىزدىڭ باستى باسىمدىعىمىز،" – دەپ حابارلادى SCAT اۋە كومپانياسى.
