قازاقستان ەۋروپالىق ينۆەستيتسيالىق بانكتەن (ەيب) €200 ملن نەمەسە قازىرگى باعام بويىنشا 102,2 ملرد تەڭگە كولەمىندە نەسيە راسىمدەدى، دەپ حابارلايدى “ادىرنا” ۇلتتىق پورتالى.
ەۋروپالىق وداق (ەو) وكىلدىگىنىڭ مالىمەتىنشە، بۇل قاراجات تۇراقتى كولىك ينفراقۇرىلىمىن دامىتۋعا، ونىڭ ىشىندە ترانسكاسپي كولىك ءدالىزىن جەتىلدىرۋگە، جاڭارتىلاتىن ەنەرگيا كوزدەرىن ارتاراپتاندىرۋعا جانە كليماتتىڭ وزگەرۋىمەن كۇرەسكە باعىتتالماق.
نەسيە قاراجاتى ۇلتتىق جول وپەراتورى «قازاۆتوجول» جۇزەگە اسىرىپ جاتقان جولداردى قالپىنا كەلتىرۋ باعدارلاماسىنا جۇمسالادى. بۇل باستاما ەلدەگى كولىك قاتىناسىن جاقسارتىپ، ينفراقۇرىلىم ساپاسىن ارتتىرۋعا باعىتتالعان.
سونىمەن قاتار، 5 مىڭ شاقىرىم ۇلتتىق جانە وڭىرلىك جول جوندەلىپ، جولاۋشىلار مەن جۇك تاسىمالىنىڭ قولجەتىمدىلىگى ارتادى، جول قاۋىپسىزدىگى مەن ەكولوگيالىق تۇراقتىلىق كۇشەيتىلەدى.
ەنەرگەتيكا سالاسىندا قارجى جاڭارتىلاتىن ەنەرگيا كوزدەرىن دامىتۋعا بولىنەدى. ەۋروپالىق ينۆەستيتسيالىق بانك (ەيب) قازاقستاننىڭ كومىرسۋتەككە تاۋەلدىلىگىن ازايتۋعا، پارنيكتىك گازدار شىعارىندىلارىن تومەندەتۋگە جانە «جاسىل» ەكونوميكاعا كوشۋىنە قولداۋ كورسەتپەك.
«بۇل ينۆەستيتسيالار قازاقستان ەكونوميكاسىن ارتاراپتاندىرۋعا جانە ونى تۇراقتى ەتۋگە كومەكتەسەدى»، – دەدى ەيب گلوبال ءبولىمىنىڭ باس ديرەكتورى ەندريۋ ماكداۋەلل.
ەۋروپالىق كوميسسيانىڭ حالىقارالىق سەرىكتەستىكتەر جونىندەگى كوميسسارى يوزەف سيكەلا ەو-نىڭ قازاقستانمەن ەكونوميكالىق سەرىكتەستىكتى تەرەڭدەتۋگە مۇددەلى ەكەنىن اتاپ ءوتتى.
ءوز كەزەگىندە، قازاقستاننىڭ دامۋ بانكىنىڭ باسقارما توراعاسى مارات ەلىباەۆ حالىقارالىق قارجى ينستيتۋتتارىمەن ارىپتەستىكتى جالعاستىرۋ ماڭىزدى ەكەنىن جەتكىزدى.
ايتا كەتەيىك، بۇعان دەيىن قازاقستان ازيا دامۋ بانكىنەن (ادب), ازيا ينفراقۇرىلىمدىق ينۆەستيتسيالار بانكىنەن (ايب) جانە حالىقارالىق قايتا قۇرۋ جانە دامۋ بانكىنەن (حقدب) جالپى سوماسى 636 ملرد تەڭگەگە نەسيە العان بولاتىن.
