Qazaqstan Europalyq investisiialyq bankten (EİB) €200 mln nemese qazırgı baǧam boiynşa 102,2 mlrd teŋge kölemınde nesie räsımdedı, dep habarlaidy “Adyrna” ūlttyq portaly.
Europalyq Odaq (EO) ökıldıgınıŋ mälımetınşe, būl qarajat tūraqty kölık infraqūrylymyn damytuǧa, onyŋ ışınde Transkaspii kölık dälızın jetıldıruge, jaŋartylatyn energiia közderın ärtaraptandyruǧa jäne klimattyŋ özgeruımen küreske baǧyttalmaq.
Nesie qarajaty ūlttyq jol operatory «QazAvtoJol» jüzege asyryp jatqan joldardy qalpyna keltıru baǧdarlamasyna jūmsalady. Būl bastama eldegı kölık qatynasyn jaqsartyp, infraqūrylym sapasyn arttyruǧa baǧyttalǧan.
Sonymen qatar, 5 myŋ şaqyrym ūlttyq jäne öŋırlık jol jöndelıp, jolauşylar men jük tasymalynyŋ qoljetımdılıgı artady, jol qauıpsızdıgı men ekologiialyq tūraqtylyq küşeitıledı.
Energetika salasynda qarjy jaŋartylatyn energiia közderın damytuǧa bölınedı. Europalyq investisiialyq bank (EİB) Qazaqstannyŋ kömırsutekke täueldılıgın azaituǧa, parniktık gazdar şyǧaryndylaryn tömendetuge jäne «jasyl» ekonomikaǧa köşuıne qoldau körsetpek.
«Būl investisiialar Qazaqstan ekonomikasyn ärtaraptandyruǧa jäne ony tūraqty etuge kömektesedı», – dedı EİB Global bölımınıŋ bas direktory Endriu Makdauell.
Europalyq komissiianyŋ halyqaralyq serıktestıkter jönındegı komissary Iozef Sikela EO-nyŋ Qazaqstanmen ekonomikalyq serıktestıktı tereŋdetuge müddelı ekenın atap öttı.
Öz kezegınde, Qazaqstannyŋ Damu bankınıŋ basqarma töraǧasy Marat Elıbaev halyqaralyq qarjy instituttarymen ärıptestıktı jalǧastyru maŋyzdy ekenın jetkızdı.
Aita keteiık, būǧan deiın Qazaqstan Aziia damu bankınen (ADB), Aziia infraqūrylymdyq investisiialar bankınen (AİİB) jäne Halyqaralyq qaita qūru jäne damu bankınen (HQDB) jalpy somasy 636 mlrd teŋgege nesie alǧan bolatyn.
Ūqsas jaŋalyqtar
