Halyk Bank باسقارماسى ەكى جاڭا مۇشەمەن تولىقتى. ولاردىڭ ءبىرى — قازاقستانداعى ەسىرتكى قىلمىسىنا قارسى كۇرەستىڭ بۇرىنعى باسشىسى، پوليتسيانىڭ گەنەرال-مايورى تىلەگەن ماتكەنوۆ. ەكىنشىسى — “كازتەلەپورت” اق ديرەكتورلار كەڭەسىنىڭ مۇشەسى اندرەي زاۆارزين، دەپ حابارلايدى “ادىرنا” ۇلتتىق پورتالى Orda.kz-كە سىلتەپ.
KASE سايتىندا 13 ناۋرىزدا جاريالانعان قۇجاتقا سايكەس، بانك باسقارماسىنىڭ قۇرامى توعىز ادامعا دەيىن كەڭەيتىلگەن. تىلەگەن ماتكەنوۆ قاۋىپسىزدىك ماسەلەلەرىنە جاۋاپ بەرسە، اندرەي زاۆارزين IT باعىتى مەن يننوۆاتسيالاردى قاداعالايتىن بولادى.
بۇل شەشىم پاۆلودارداعى Halyk Bank بولىمشەسىن توناۋ وقيعاسىنان كەيىن قابىلدانعان. وقيعادان كەيىن ۇلتتىق بانك ەلدەگى بارلىق قارجى مەكەمەلەرى ءۇشىن قاۋىپسىزدىك شارالارىن كۇشەيتۋگە تاپسىرما بەرگەن ەدى.
گەنەرال-مايور تىلەگەن ماتكەنوۆ – ىشكى ىستەر مينيسترلىگىنىڭ ەڭبەك سىڭىرگەن قىزمەتكەرى. ول اقمولا (2009–2012), قوستاناي (2012–2016), جامبىل (2016–2018) وبلىستارىنىڭ ىشكى ىستەر دەپارتامەنتتەرىن باسقارعان. 2019–2022 جىلدارى ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى بولدى.
ماتكەنوۆ بۇعان دەيىن بىرنەشە داۋلى وقيعالارعا بايلانىستى اتالعان. 2012 جىلى قوستانايدا ونىڭ تۇرعان تاۋنحاۋسى تونالعانى تۋرالى اقپارات تاراعان. سونداي-اق، 2022 جىلى قارجى مونيتورينگى اگەنتتىگى زاڭسىز ماينينگكە قارسى كۇرەس ەسەبىندە ونىڭ اتى-ءجونى اتالعان. اگەنتتىك “ماتكەنوۆپەن بايلانىسى بار كومپانيالار زاڭسىز ماينينگپەن اينالىسقان” دەپ مالىمدەگەن.
Halyk Bank-ءتىڭ جاڭا توپ-مەنەدجەرلەرىنىڭ ءبىرى اندرەي زاۆارزين IT جانە يننوۆاتسيالار باعىتىن قاداعالايدى. ول “كازتەلەپورت” اق ديرەكتورلار كەڭەسىنىڭ مۇشەسى جانە قازاقستاننىڭ تەلەكوممۋنيكاتسيا سالاسىندا تاجىريبەسى مول مامان.
Halyk Bank باسقارماسىنىڭ كەڭەيۋى قارجى ۇيىمىنىڭ قاۋىپسىزدىك شارالارىن كۇشەيتىپ، IT-سەكتورداعى يننوۆاتسيالاردى دامىتۋعا باعىتتالعان قادام رەتىندە قاراستىرىلىپ وتىر.
