"حۋتورلىقتار" دەپ تانىلعان ۇيىمداسقان قىلمىستىق توپتىڭ جەتەكشىسى حاسان قاسىمباەۆتىڭ ىسىنە تاعى ءبىر جابىرلەنۋشى قوسىلدى. بۇل تۋرالى العاشقى جابىرلەنۋشىنىڭ ادۆوكاتى مالىمدەدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
ەسكە سالساق، قاسىمباەۆقا ادام ۇرلاۋ، دەنساۋلىققا قاساقانا اۋىر زيان كەلتىرۋ جانە بوپسالاۋ فاكتىلەرى بويىنشا تەرگەۋ جۇرگىزىلىپ جاتىر. ادۆوكات الىشەر الىشەۆتىڭ ايتۋىنشا، قازىر ءىس بويىنشا ەكى جابىرلەنۋشى بار.
"ۇرلاۋ مەن دەنساۋلىققا اۋىر زيان كەلتىرۋ ءبىر جابىرلەنۋشىگە، ال بوپسالاۋ باسقا جابىرلەنۋشىگە قاتىستى تەرگەلىپ جاتىر", – دەدى ادۆوكات.
سونداي-اق، ول حاسان قاسىمباەۆتىڭ قازىرگى ۋاقىتتا تۇرمەدە وتىرعانىن جانە قوسىمشا تەرگەۋ امالدارى جۇرگىزىلىپ جاتقانىن مالىمدەدى.
"قازىر تەرگەۋ اياقتالىپ، ءىس ماتەريالدارىمەن تانىسۋعا مۇمكىندىك بەرىلۋىن كۇتىپ وتىرمىز", – دەدى الىشەر الىشەۆ.
قاسىمباەۆتىڭ ەسىمى تالعارداعى شەرزات پولاتتىڭ ولىمىنەن كەيىن كەڭىنەن تانىلدى. الماتى وبلىسىنىڭ سوتى ونى ەكى ايعا قاماۋ تۋرالى شەشىم شىعارعان. بۇعان دەيىن قۇقىق قورعاۋ ورگاندارى ونى 2021 جىلى جاساعان قىلمىسى ءۇشىن ارنايى وپەراتسيا كەزىندە تۇتقىنداعان بولاتىن.
ايتا كەتەيىك، قاسىمباەۆتىڭ ءىنىسى ەرجان قاسىمباەۆ 2017 جىلدان بەرى كەدەن قىزمەتكەرى مەدەت جاماشەۆتى ولتىرگەنى ءۇشىن تۇرمەدە وتىر. ال شەرزات پولاتتىڭ ولىمىنەن كەيىن، 15 قازاندا، تالعار اۋدانى اكىمى اپپاراتىنىڭ باسشىسى بولعان اسلان قاسىمباەۆ قىزمەتىنەن بوساتىلدى.
قازىر تەرگەۋ جالعاسىپ جاتىر.
