الماتى مەن شىمكەنتتە «ديكي ارمان» جەتەكشىلىك ەتكەن قىلمىستىق توپتىڭ 15 مۇشەسى ۇستالدى، دەپ حابارلايدى “ادىرنا” ۇلتتىق پورتالى.
مينيسترلىك ۇيىمداسقان قىلمىسقا قارسى كۇرەس دەپارتامەنتى سوڭعى ەكى جىلدا 140-تان استام قىلمىستىق توپتاردىڭ قىزمەتىن توقتاتىپ، قىلمىس الەمىنىڭ 550-دەن استام وكىلىن جاۋاپقا تارتتى.
“اسا قاۋىپتى قىلمىستىق توپتاردى، ونىڭ ىشىندە قاڭتار وقيعاسى كەزىندە جاپپاي تارتىپسىزدىككە قاتىسقانداردى قۇرىقتاۋ بويىنشا جۇمىس اياقتالىپ جاتىر. بيىل تامىزدا ۇلتتىق قاۋىپسىزدىك كوميتەتى جانە باس پروكۋراتۋرامەن بىرلەسىپ، الماتى جانە شىمكەنت قالالارىندا ءبىر ۋاقىتتا «ديكي ارماننىڭ» ۇيىمداسقان قىلمىستىق توبىنىڭ 15 ىقتيمال مۇشەسىنە قاتىستى ۇستاۋ جانە ءتىنتۋ شارالارىن جۇرگىزدى. توپتىڭ جەتەكشىسى مەن نەگىزگى مۇشەلەرى قاماۋعا الىنعانىمەن، ونىڭ باسقا مۇشەلەرى بوستاندىقتا زاڭسىز ارەكەتتەردى جاساۋدى جالعاستىرعان”، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
ونىڭ ايتۋىنشا، 40-تان استام ءتىنتۋ ءىس-شارالارى جۇرگىزىلىپ، اتىس، تراۆماتيكالىق جانە سۋىق قارۋ، تاعى باسقا زاتتاي دالەلدەمەلەر تاركىلەنگەن. بارلىق كۇدىكتى ۋاقىتشا ۇستاۋ يزولياتورىنا قامالدى.
بۇدان باسقا، ءىىم قىلمىستىق-اتقارۋ جۇيەسى كوميتەتىمەن بىرلەسىپ، قىلمىستىق توپتىڭ جەتەكشىلەرى مەن نەگىزگى مۇشەلەرى وتىرعان مەكەمەلەردە جاعدايدى تۇراقسىزداندىرۋعا جول بەرمەۋ جانە ءتيىستى رەجيمدى قامتاماسىز ەتۋ جونىندە شارالار قابىلدانىپ جاتىر.
