12 ناۋرىزداعى مالىمەتكە سايكەس، قازاقستاندا سالىق تولەۋشىلەر بيۋدجەتكە 17 ملرد تەڭگە اۋدارعان. بۇل سومانىڭ ىشىندە BI Group جانە BAZIS كومپانيالارىنىڭ تولەمدەرى بار، دەپ حابارلايدى "ادىرنا" ۇلتتىق پورتالى قارجى مينيسترلىگىنىڭ ءباسپاسوز قىزمەتىنە سىلتەپ.
«قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتى (مكك) جالپىعا بىردەي بەلگىلەنگەن رەجيمدە جۇمىس ىستەيتىن جانە سالىقتىق مىندەتتەمەلەرىن جەكە كاسىپكەرلەرمەن ءوزارا ەسەپ ايىرىسۋ ارقىلى وڭتايلاندىراتىن سالىق تولەۋشىلەردى اكىمشىلەندىرۋدى جالعاستىرۋدا. 12 ناۋرىزداعى جاعداي بويىنشا سالىق تولەۋشىلەر قوسىمشا ەسەپ بەرۋ نىساندارىن تاپسىرىپ، سالىقتارىن تولەپ جاتىر. قازىردىڭ وزىندە 17 ملرد تەڭگە تولەندى، ونىڭ ىشىندە BI Group جانە BAZIS كومپانيالارى دا بار. دەرەكتەردى سالىستىرۋ جۇمىستارى جالعاسۋدا»، – دەلىنگەن حابارلامادا.
كىرىستى تومەندەتۋ بەلگىلەرى بويىنشا 633 سالىق تولەۋشىگە حابارلاما جىبەرىلگەن. ولاردىڭ 172-ءسى قۇرىلىس سالاسىندا جۇمىس ىستەيدى، سونىڭ ىشىندە بارلىق ءىرى قۇرىلىس كومپانيالارى بار، ال 102-ءسى ساۋدا سالاسىندا قىزمەت ەتەدى.
كەيبىر كومپانيالار مكك-گە قۇرىلىس سالاسىنداعى كولەڭكەلى سحەمالارمەن كۇرەسۋ جانە قارجى اينالىمىنىڭ اشىقتىعىن ارتتىرۋ ماقساتىندا تسيفرلىق شەشىمدەردى ازىرلەۋدى قارجىلاندىرۋدى ۇسىندى.
مكك ەگەر حابارلامالار ورىندالماسا، كەشەندى سالىقتىق تەكسەرۋلەر باستالۋى مۇمكىن ەكەنىن ەسكەرتتى.
ەسكە سالا كەتەيىك، 28 اقپاندا قازاقستان پرەمەر-ءمينيسترى ولجاس بەكتەنوۆ BI Group جانە BAZIS سياقتى ءىرى بيزنەس وكىلدەرىنە قاتاڭ ەسكەرتۋ جاساپ، سالىقتارىن تولەۋگە ەكى اپتا ۋاقىت بەرگەن ەدى. كەيىن BI Group سالىق تولەمدەرى بويىنشا مالىمدەمە جاسادى.
