12 наурыздағы мәліметке сәйкес, Қазақстанда салық төлеушілер бюджетке 17 млрд теңге аударған. Бұл соманың ішінде BI Group және BAZIS компанияларының төлемдері бар, деп хабарлайды "Адырна" ұлттық порталы Қаржы министрлігінің баспасөз қызметіне сілтеп.
«Қазақстан Республикасы Қаржы министрлігі Мемлекеттік кірістер комитеті (МКК) жалпыға бірдей белгіленген режимде жұмыс істейтін және салықтық міндеттемелерін жеке кәсіпкерлермен өзара есеп айырысу арқылы оңтайландыратын салық төлеушілерді әкімшілендіруді жалғастыруда. 12 наурыздағы жағдай бойынша салық төлеушілер қосымша есеп беру нысандарын тапсырып, салықтарын төлеп жатыр. Қазірдің өзінде 17 млрд теңге төленді, оның ішінде BI Group және BAZIS компаниялары да бар. Деректерді салыстыру жұмыстары жалғасуда», – делінген хабарламада.
Кірісті төмендету белгілері бойынша 633 салық төлеушіге хабарлама жіберілген. Олардың 172-сі құрылыс саласында жұмыс істейді, соның ішінде барлық ірі құрылыс компаниялары бар, ал 102-сі сауда саласында қызмет етеді.
Кейбір компаниялар МКК-ге құрылыс саласындағы көлеңкелі схемалармен күресу және қаржы айналымының ашықтығын арттыру мақсатында цифрлық шешімдерді әзірлеуді қаржыландыруды ұсынды.
МКК егер хабарламалар орындалмаса, кешенді салықтық тексерулер басталуы мүмкін екенін ескертті.
Еске сала кетейік, 28 ақпанда Қазақстан премьер-министрі Олжас Бектенов BI Group және BAZIS сияқты ірі бизнес өкілдеріне қатаң ескерту жасап, салықтарын төлеуге екі апта уақыт берген еді. Кейін BI Group салық төлемдері бойынша мәлімдеме жасады.
