قازاقستاننىڭ ەكس-پرەزيدەنتى نۇرسۇلتان نازارباەۆتىڭ ورتانشى قىزى دينارا قۇلىباەۆا مەن ونىڭ كۇيەۋى، وليگارح تيمۋر قۇلىباەۆتىڭ وتباسى كونستيتۋتسيالىق سوت ارقىلى بۇرىن مەملەكەتكە قايتارىلعان قازاقستان-بريتان تەحنيكالىق ۋنيۆەرسيتەتىن (قبتۋ) قايتارىپ الماقشى. بۇل تۋرالى قازتاگ اگەنتتىگى جاريالادى، دەپ حابارلايدى “ادىرنا”.
«مۇنداي ماسەلەلەر بويىنشا كوميسسيا بولسا دا شەشىم تەك سوتتا عانا قابىلدانادى. بۇگىندە، مەنىڭ بىلۋىمشە، ءبىرىنشى جانە ەكىنشى سوت ينستانتسيالارى اياقتالدى. دەگەنمەن، كونستيتۋتسيالىق شاعىم قالدى. سوندىقتان، مەنىڭ تۇسىنۋىمشە، قازىر قاراۋدى كونستيتۋتسيالىق سوت كۇتىپ تۇر، سوڭعى ءسوز جوعارعى سوتتا بولادى. ءبىز تەك ونىڭ شەشىمىن كۇتە الامىز. مەن قازىر ەشتەڭەگە تۇسىنىكتەمە بەرە المايمىن، ويتكەنى ءبارى زاڭ سالاسىندا بولىپ جاتىر. تەرگەۋ ءجۇرىپ جاتىر، ءبىزدىڭ مينيسترلىكتىڭ بۇل پروتسەسكە ەش قاتىسى جوق. وسىلايشا، سوت شەشىمىن كۇتۋ كەرەك، سودان كەيىن عانا ءبىز ونىڭ قالاي جۇزەگە اسىرىلاتىنى تۋرالى تۇسىنىكتەمە بەرە الامىز»، - دەدى سەيسەنبى كۇنى ۇكىمەتتىڭ بريفينگىندە قبتۋ-دى مەملەكەتكە قايتارۋ تۋرالى ءسوز سويلەگەن عىلىم جانە جوعارى ءبىلىم ءمينيسترى ساياسات نۇربەك.
جۋرناليستەر ناقتىلاپ، “بۇل بۇرىنعى يەلەرىنىڭ الدىڭعى ينستانتسيالاردا جەڭىلگەنىن بىلدىرە مە؟” دەگەن سۇراق قويدى.
«مەنىڭ بىلۋىمشە، ءبىرىنشى ينستانتسيانىڭ شەشىمى كۇشىندە قالدىرىلدى، ال ەكىنشى ينستانتسيانىڭ شەشىمى بويىنشا مۇلىك مەملەكەتكە قايتارىلۋى ءتيىس. وسىدان بارىپ اقپارات شىقتى. بىراق شاعىمدار بىرنەشە رەت قايتالاندى، بۇل ءبىزدىڭ سوت جۇيەمىزدىڭ جۇمىسى تۋرالى ماسەلە»، - دەدى نۇربەك.
بۇعان دەيىن الماتىداعى قبتۋ-دىڭ يەسى، جالعىز قۇرىلتايشىسى بولعان دينارا قۇلىباەۆا نەگىزىن قالاعان “نۇرسۇلتان نازارباەۆ ءبىلىم بەرۋ قورى” بولاتىن. 4 ناۋرىزدا ءىرى ورتتەن كەيىن قۇلىباەۆتار وتباسى قبتۋ-دى باقىلاۋدى توقتاتقان.
ەستەرىڭىزگە سالا كەتەيىك، توتەنشە جاعدايلار مينيسترلىگى 11 قاڭتار كۇنى ساعات 22.00 شاماسىندا قبتۋ عيماراتىندا ءورت شىققانى تۋرالى حابارلاعانىمەن، باستاپقىدا ءورت ءسوندىرىلىپ جاتقان عيماراتتىڭ اتىن اتاماي، نىساندى «عيماراتتاردىڭ ءبىرى» دەپ اتادى. كەيىن ءورت سوندىرۋشىلەر ءورتتى سوندىرۋدە قيىندىقتار تۋىنداعانىن حابارلادى. ءتىپتى كەيىنىرەك استانانىڭ الماتىداعى قبتۋ عيماراتىنداعى ءورتتى ءسوندىرۋ ءۇشىن كۇشتەر مەن قۇرالداردى ارتتىرۋدى تاپسىرعانى بەلگىلى بولدى. ءورت ءتۇن ورتاسى شاماسىندا وقشاۋلانعان.
