اقش رەسمي تۇردە USAID باعدارلامالارىنىڭ 83 پايىزىن توقتاتادى. بۇل تۋرالى بۇگىن، 10 ناۋرىزدا مەملەكەتتىك حاتشى ماركو رۋبيو مالىمدەدى، دەپ حابارلايدى «ادىرنا» ءتىلشىسى.
ايتۋىنشا، قۇنى ونداعان ميلليارد دوللاردى قۇرايتىن 5200 كەلىسىمشارتتىڭ كۇشى جويىلعان.
«ولار امەريكا قۇراما شتاتتارىنىڭ نەگىزگى ۇلتتىق مۇددەلەرىنە قىزمەت ەتپەدى جانە كەيبىر جاعدايدا ءوز زيانىن دا تيگىزدى»،— دەدى رۋبيو.
مەملەكەتتىك حاتشى كونگرەسپەن جۇرگىزىلگەن كونسۋلتاتسيالاردان كەيىن قالعان شامامەن 1000 باعدارلاما اقش مەملەكەتتىك دەپارتامەنتىنىڭ تىكەلەي باسقارۋىنا وتەتىنىن اتاپ ءوتتى.
ەسكە سالايىق، اقپان ايىنىڭ سوڭىندا دونالد ترامپ اكىمشىلىگى USAID اگەنتتىگىنىڭ كەلىسىمشارتتارىنىڭ 90%-دان استامىن جويۋدى جوسپارلاپ وتىرعانىن جەتكىزگەن ەدى.
«بۇل اگەنتتىككە ءبىر توپ راديكال باسشىلىق ەتەدى. ءبىز ولاردى جۇمىستان بوساتامىز، سودان كەيىن شەشىم قابىلدايمىز»،— دەگەن بولاتىن اقش پرەزيدەنتى.
ال يلون ماسك باسقاراتىن DOGE ۇيىمى USAID قارجىسى نەگىزسىز جاراتىلعان دەپ شەشتى.
USAID —ازاماتتىق سىرتقى كومەك پەن دامۋ سالاسىنداعى ىنتىماقتاستىقتى باسقارۋعا جاۋاپتى حالىقارالىق دامۋ اگەنتتىگى. ونىڭ جىلدىق بيۋدجەتى 42,8 ميلليارد دوللاردى قۇرايدى. اگەنتتىك 100-دەن استام ەلدە، ونىڭ ىشىندە قازاقستاندا دا جۇمىس ىستەيدى.
