19 قازان – قۇتقارۋشىلار كۇنى. بۇل كۇن – ءتىلسىز جاۋمەن كۇرەسىپ، ادام ءومىرىن ساقتاپ قالۋ ءۇشىن قاۋىپكە باس تىگەتىن ازاماتتاردىڭ ەڭبەگىن ەسكە الاتىن ەرەكشە داتا. الايدا ەرلىك تەك ارنايى قىزمەت وكىلدەرىنىڭ ءىس-ارەكەتىمەن شەكتەلمەيدى. كەيدە قاراپايىم ادامدار دا قيىن ساتتە ءوز ءومىرىن قاۋىپكە تىگىپ، جاقىندارىن اجالدان اراشالاپ قالادى.
ولاردىڭ اراسىندا وتباسىن قۇتقارعان اكەلەر، باۋىرىن قورعاعان بالالار، شاكىرتتەرى ءۇشىن جانىن قيعان ۇستازدار مەن قارۋلاستارىنا كومەكتەسكەن ساربازدار بار. قازاقستاندا وسىنداي ەرلىگىمەن ەل ەسىندە قالعان ازاماتتار از ەمەس. ولاردىڭ وقيعالارى ادام ءومىرىنىڭ قادىرىن، جاقىنعا دەگەن سۇيىسپەنشىلىك پەن جانقيارلىقتىڭ ءمانىن ۇعىندىرادى.
وتباسىن ورتتەن قۇتقارىپ، ءوزى قازا تاپتى
2025 جىلعى 9 قازاندا پاۆلودار وبلىسى تەرەڭكول اۋدانىندا قايعىلى وقيعا بولدى. جەكە تۇرعىن ۇيدەن ءورت شىعىپ، جالىن اعاش شاتىر كونسترۋكتسيالارىن شارپىعان.
ءورت سوندىرۋشىلەر جەتكەنگە دەيىن 1982 جىلى تۋعان نۇرجان يساەۆ ايەلى مەن ءۇش بالاسىن تەرەزە ارقىلى سىرتقا الىپ شىققان. وسىلايشا ول وتباسى مۇشەلەرىنىڭ ءومىرىن ساقتاپ قالدى.
الايدا ءوزى ەس-ءتۇسسىز كۇيدە اۋرۋحاناعا جەتكىزىلدى. دارىگەرلەر ونىڭ ءومىرىن ساقتاپ قالا المادى.
پاۆلودار وبلىستىق توتەنشە جاعدايلار دەپارتامەنتىنىڭ مالىمەتىنشە، ءورتتىڭ اۋماعى 100 شارشى مەتردى قۇراعان.
بەس ادامنان تۇراتىن وتباسىنىڭ امان قالۋى – اكەنىڭ باتىلدىعى مەن ءوز جاقىندارى ءۇشىن جاساعان جانقيارلىق ارەكەتىنىڭ ناتيجەسى.
باۋىرىن قۇتقارام دەپ ءوزى سۋعا كەتتى
2020 جىلعى 25 ماۋسىمدا جەزقازعان قالاسىندا قايعىلى جاعداي بولدى. 14 جاستاعى ءجاسوسپىرىم سۋعا باتىپ بارا جاتقان 13 جاستاعى اپكەسىن قۇتقارۋ ءۇشىن سۋعا تۇسكەن.
وقيعا جەزقازعان – ساتباەۆ تاسجولىنىڭ ماڭىندا بولعان. كوممۋنالدىق اپاتتان كەيىن پايدا بولعان سۋ جينالعان شۇڭقىرعا قىز قۇلاپ كەتكەن. مۇنى كورگەن اعاسى ويلانباستان ونى قۇتقارۋعا ۇمتىلعان.
الايدا ءجاسوسپىرىم ءوز كۇشىن ەسەپتەي الماي، سۋعا باتىپ كەتكەن. بالالاردىڭ جانايقايىن ەستىگەن ءوتىپ بارا جاتقان ادامدار كومەككە كەلىپ، قىزدى قۇتقارىپ قالعان. ال بالانىڭ دەنەسى كەيىنىرەك سۋدان تابىلعان.
وقيعادان كەيىن قالا اكىمدىگى مەن پوليتسيا ءتيىستى تەكسەرۋ جۇرگىزگەن. كۋاگەرلەردىڭ ايتۋىنشا، سۋ جينالعان شۇڭقىردىڭ اينالاسىندا قورشاۋ بولماعان.
بۇل وقيعا باۋىرىن قورعاۋ ءۇشىن جانىن قيعان بالانىڭ ەرلىگىمەن قاتار، ادام ومىرىنە قاۋىپ توندىرەتىن اشىق سۋ قويمالارى مەن قاراۋسىز قالعان شۇڭقىرلاردىڭ قانشالىقتى قاۋىپتى ەكەنىن دە كورسەتتى.
شاكىرتتەرى ءۇشىن ءومىرىن قيعان جاس ۇستاز
2021 جىلعى 31 مامىردا الماتى قالاسىنداعى №199 گيمنازيانىڭ 26 جاستاعى مۇعالىمى مەرەي يبراگيموۆ شارىن شاتقالىندا وقۋشىنى قۇتقارۋ كەزىندە قازا تاپتى.
مەرەي يبراگيموۆ كوركەمدىك پاندەردەن ساباق بەرگەن. پەداگوگيكالىق ەڭبەك ءوتىلى بەس جىل بولعان ۇستازدى ارىپتەستەرى مەن شاكىرتتەرى جاۋاپكەرشىلىگى جوعارى، شىعارماشىلىق تۇلعا رەتىندە سيپاتتاعان.
قايعىلى وقيعا كەزىندە مۇعالىم بالالارعا كومەكتەسىپ، وقۋشىنى قۇتقارۋعا تىرىسقان. وسى ساتتە ونىڭ ءوزى دە اجال قۇشتى.
الماتى قالاسىنىڭ ءبىلىم باسقارماسى مەرەي يبراگيموۆتىڭ مەكتەپ ۇجىمىندا ەرەكشە قۇرمەتكە يە بولعانىن اتاپ ءوتتى. ونى وقۋشىلارى جاقسى كورەتىن، ءاردايىم اينالاسىنا جىلۋلىق سىيلايتىن ۇستاز رەتىندە ەسكە الدى.
جاس پەداگوگتىڭ ەرلىگى – ۇستازدىقتىڭ تەك ءبىلىم بەرۋمەن شەكتەلمەيتىنىن، كەيدە شاكىرتىنىڭ ءومىرى ءۇشىن جاۋاپكەرشىلىكتى ءوز موينىنا الۋعا دايىن بولۋ ەكەنىن كورسەتەدى.
سوڭعى ءساتكە دەيىن وزگەلەردى قۇتقاردى
2022 جىلعى 9 تامىزدا الماتى وبلىسىنداعى اسكەري وقۋ-جاتتىعۋ پوليگونىندا قاتتى داۋىل سوعىپ، ساربازدار ورنالاسقان شاتىرلى قالاشىقتى قيراتتى. وقۋ-جاتتىعۋ ورتالىعىندا 15 اسكەري قىزمەتشى بولعان. شكۆالدى جەل شاتىرلاردى ۇشىرىپ، اينالانى شاڭ باسقان كەزدە ساربازدار قاۋىپسىز جەرگە شىعۋعا تىرىستى. 19 جاستاعى قاتارداعى جاۋىنگەر الماس شاحيموۆ بىرنەشە قارۋلاسىنىڭ ءومىرىن ساقتاپ قالۋعا كومەكتەستى. ول ساربازداردى قاتتى جەلدەن قورعايتىن جەرگە باعىتتاپ، ءوزى وزگەلەردى قۇتقارۋ ءۇشىن قايتا ورالعان.
الماس اسكەري قىزمەتشىلەردىڭ قاۋىپسىز جەرگە شىعۋىنا كومەكتەسىپ، شاتىردان ەڭ سوڭعى بولىپ شىققان. سول ساتتە جەل شاتىردىڭ مەتالل قاڭقاسىن جۇلىپ اكەتىپ، ونىڭ باسىنا سوققى تيگەن.
الماس شاحيموۆ اۋرۋحاناعا جەتكىزىلگەنىمەن، دارىگەرلەر ونىڭ ءومىرىن ساقتاپ قالا المادى.
ونىڭ قارۋلاستارى الماستىڭ ارەكەتىن ەرلىك دەپ باعالادى. ول وزگەلەردىڭ اماندىعىن ءوز ومىرىنەن جوعارى قويعان ازامات رەتىندە ەستە قالدى.
الماس كوكشەتاۋ قالاسىنان اسكەرگە شاقىرىلعان. ازاماتتىق قورعانىس كوللەدجىندە ءورت قاۋىپسىزدىگى ماماندىعىن وقىعان جاس جىگىتتىڭ ءوزى دە ادامداردى قۇتقارۋدى ماقسات ەتكەن.
ەرلىك – جاقىنىڭنىڭ ءومىرىن ءوز ومىرىڭنەن جوعارى قويۋ
بۇل وقيعالاردىڭ ارقايسىسى ءار كەزەڭدە، ءارتۇرلى جاعدايدا بولعانىمەن، ولاردى بىرىكتىرەتىن ورتاق قاسيەت بار. ول – جاقىندارىنىڭ ءومىرىن ساقتاپ قالۋ ءۇشىن قاۋىپكە قاراماستان ارەكەت ەتۋ.
ءبىرى وتقا ورانعان ۇيدەن ايەلى مەن بالالارىن الىپ شىقتى. ەكىنشىسى سۋعا باتىپ بارا جاتقان اپكەسىنە كومەكتەسۋگە ۇمتىلدى. تاعى ءبىرى شاكىرتىن قۇتقارسا، جاس سارباز قارۋلاستارىنىڭ اماندىعى ءۇشىن سوڭعى ساتىنە دەيىن كۇرەستى.
ولاردىڭ ەرلىگى – قوعام ءۇشىن ۇلكەن ونەگە. سونىمەن بىرگە مۇنداي قايعىلى وقيعالار قاۋىپسىزدىك تالاپتارىن ساقتاۋ، قاۋىپتى نىسانداردى قورشاۋ، توتەنشە جاعدايلاردىڭ الدىن الۋ جانە ادامدارعا العاشقى كومەك كورسەتۋ داعدىلارىن ۇيرەتۋدىڭ ماڭىزىن ەسكە سالادى. ولاردىڭ ەسىمدەرى مەن جاساعان جاقسىلىعى ۇمىتىلمايدى.
گۇلبارشىن نۇرحان
«ادىرنا» ۇلتتىق پورتالى
