لوندونداعى القابيلەر سوتى رەسەيدىڭ تاپسىرىسى بويىنشا تىڭشىلىقپەن اينالىستى دەپ ايىپتالعان ءۇش بولگاريا ازاماتىن كىنالى دەپ تاپتى. بۇل توپ بەلگىلى جۋرناليستەر رومان دوبروحوتوۆ پەن حريستو گروزەۆتى اڭدىپ، قازاقستانعا قارسى اقپاراتتىق شابۋىل ۇيىمداستىرۋعا تىرىسقان دەگەن اقپارات تاراۋدا، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
سونداي-اق، ولار اتىراۋ وبلىسىنىڭ بۇرىنعى اكىمى، ۇلىبريتانيادا تۇرىپ جاتقان بەرگەي رىسقاليەۆتى باقىلاعان.
ۆۆس سوت قۇجاتتارىنا سىلتەمە جاساپ، ەكس-اكىم رىسقاليەۆتى اڭدۋ رەسەي مەن قازاقستان اراسىنداعى بايلانىستى نىعايتۋ ماقساتىندا جۇزەگە اسقان بولۋى مۇمكىن دەپ جازدى. قازاقستان بيلىگى ءۇشىن ساياسي وپپونەنتتەرىن قۋدالاۋ ءتيىمدى بولعان دەگەن بولجام بار.
سونىمەن قاتار، بۇل توپ قازاقستان پرەزيدەنتى قاسىم-جومارت توقاەۆتىڭ ۇلىنا قاتىستى قارالاۋ وپەراتسياسىن ۇيىمداستىرۋدى كوزدەگەن. Telegraph باسىلىمىنىڭ مالىمەتىنشە، سوتتالۋشىلار جالعان گەي-پورنو جاساۋعا تالپىنعان. ولار ءتىپتى گەي-كلۋب يەسىنەن سۇحبات الىپ، توقاەۆتىڭ ۇلى جايلى جالعان اقپارات ايتقىزۋعا تىرىسقان.
بۇل جوسپاردان سوڭىندا باس تارتقانىمەن، ولار قازاقستاننىڭ لوندونداعى ەلشىلىگى الدىندا "جالعان نارازىلىق اكتسياسىن" وتكىزۋدى جوسپارلاعان. توپ مۇشەلەرى درون ارقىلى عيماراتقا شوشقا قانىن توگۋدى كوزدەپ، ءتىپتى سىناق جۇرگىزگەن.
ايىپتاۋشىلاردىڭ ايتۋىنشا، بۇل وپەراتسيالارعا تاپسىرىس بەرگەن – Wirecard تولەم جۇيەسىنىڭ بۇرىنعى وپەراتسيالىق ديرەكتورى يان مارسالەك.
بريتان پروكۋرورلارىنىڭ مالىمەتىنشە، بولگاريا ازاماتتارى 2020 جىلدىڭ تامىزىنان 2023 جىلدىڭ اقپانىنا دەيىن رەسەيدىڭ ارنايى قىزمەتتەرىنە اقپارات جيناپ، تىڭشىلىق جاساعان.
سوتتالعانداردىڭ قاتارىندا ۆانيا گابەروۆا، كاترين يۆانوۆا جانە تيحومير يۆانچەۆ بار. بۇعان دەيىن وسى توپقا قاتىسى بار تاعى ءۇش ادام كىنالى دەپ تانىلعان.
يۆانوۆا تىڭشىلىقپەن قاتار، بىرنەشە جالعان قۇجات قولدانعانى ءۇشىن دە جاۋاپقا تارتىلدى. تەرگەۋ ماتەريالدارىنا سايكەس، تىڭشىلار ءوز قىزمەتتەرى ءۇشىن قارجىلاي سىياقى الىپ وتىرعان.
