31 مامىردا قىرعىز رەسپۋبليكاسىنىڭ پارلامەنتى «مەملەكەتتىك ءتىل تۋرالى» زاڭ جوباسىن ءۇشىنشى وقىلىمدا قابىلداعان بولاتىن. قۇجاتتا بارلىق مەملەكەتتىك جانە مۋنيتسيپالدىق قىزمەتكەرلەردى مەملەكەتتىك (قىرعىز) ءتىلىن بىلۋگە جانە ءتيىستى ەمتيحانداردى تاپسىرۋعا مىندەتتەلەتىنى جازىلعان. وسىعان قاتىستى رەسەي سىرتقى ىستەر مينيسترلىگى جاۋاپ بەردى، دەپ جازادى "ادىرنا". رەسمي جاۋاپ مينيسترلىكتىڭ سايتىندا جاريالاندى.
ء"بىزدىڭ بىلۋىمىزشە، «قىرعىز رەسپۋبليكاسىنداعى مەملەكەتتىك ءتىل تۋرالى» زاڭ جوباسى سوناۋ 2021 جىلى تالقىلاۋعا ۇسىنىلعان، سودان كەيىن ونىڭ باستاپقى نۇسقاسى قىرعىز قوعامىندا، ونىڭ ىشىندە ءورىستىلدى تۇرعىندار تاراپىنان دا سىني پىكىرلەرگە ۇلاستى. كەيىننەن قۇجات پىسىقتالىپ، وعان بۇرىن جەتىسپەيتىن نورمالار، مىسالى، بارلىق ەتنوستارعا انا ءتىلىن ساقتاۋ مەن دامىتۋ كەپىلدىگى تۋرالى ەرەجەلەر ەنگىزىلدى. سونىمەن بىرگە، زاڭ جوباسىندا مەملەكەتتىك ءتىلدى بىلمەۋ نەگىزىندە ازاماتتاردىڭ قۇقىقتارى مەن بوستاندىقتارىنا قول سۇعۋعا جول بەرمەۋ تۋرالى نورما ەنگىزىلمەگەن.
زاڭ قازىرگى تۇرىندە رەسپۋبليكانىڭ قىرعىز ءتىلىن بىلمەيتىن ازاماتتارى ءۇشىن بەلگىلى ءبىر قيىندىقتار تۋعىزۋى مۇمكىن. ءبىز قىرعىز ازاماتتارىنىڭ نازارىن زاڭنىڭ قابىلدانۋى تيتۋلدىق ەمەس حالىقتىڭ، ونىڭ ىشىندە ءبىزدىڭ وتانداستارىمىزدىڭ قۇقىقتارىنا قاتىستى جاعدايعا جاعىمسىز اسەر ەتۋى مۇمكىن ەكەنىنە بىرنەشە رەت ەسكەرتۋ جاسادىق.
ارىپتەستەر زاڭ جوباسى ورىس ءتىلىن جويۋدى ماقسات ەتپەيتىنىنە سەندىردى. وسىعان بايلانىستى قىرعىز رەسپۋبليكاسىنىڭ باسشىلىعى وداقتاستىق قارىم-قاتىناستار نەگىزىندە قىرعىز ءتىلىن دامىتۋعا دا، كونستيتۋتسيالىق مارتەبەگە يە ورىس ءتىلىن قولداۋعا جانە قىرعىزستانداعى رەسمي ءتىل جانە تاۋەلسىز مەملەكەتتەر دوستاستىعى كەڭىستىگىندەگى ۇلتارالىق قاتىناس ءتىلىن ناسيحاتتاۋعا باعىتتالعان تەڭگەرىمدى ءتىل ساياساتىن جۇرگىزەدى دەپ كۇتەمىز" دەلىنگەن رەسەي ءسىم رەسمي جاۋابىندا.
