ساتىبالدى ءابىشۇلى اتىنداعى سارىاعاش مەدرەسە-كوللەدجىنە 2018 جىلدان بەرى مەملەكەتتەن 1,9 ميلليارد تەڭگەدەن استام قارجى بولىنگەن. الايدا بۇل قاراجاتتىڭ قالاي جۇمسالىپ جاتقانى قوعامدا سۇراق تۋدىرىپ وتىر، دەپ حابارلايدى “ادىرنا” ۇلتتىق پورتالى.
Orda.kz سايتىنىڭ زەرتتەۋىنە سايكەس، تۇركىستان وبلىستىق ءبىلىم باسقارماسى بۇل ءدىني مەكەمەگە جىل سايىن 200 ميلليون تەڭگەدەن استام قارجى ءبولىپ كەلەدى. مەملەكەت دىنگە ارالاسپايدى دەگەن قاعيداتقا قاراماستان، زاڭ بويىنشا كەز كەلگەن ءبىلىم بەرۋ ۇيىمى مەملەكەتتىك گرانت الا الادى.
جىلدار بويىنشا بولىنگەن قارجى:
•2018 جىلى – 336,08 ملن تەڭگە
•2019 جىلى – 400,23 ملن تەڭگە
•2020 جىلى – 137,96 ملن تەڭگە
•2021 جىلى – 54,47 ملن تەڭگە
•2022 جىلى – 143,90 ملن تەڭگە
•2023 جىلى – 296,35 ملن تەڭگە
•2024 جىلى – 280,03 ملن تەڭگە
•2025 جىلى – 290,89 ملن تەڭگە
بۇل ماسەلەنى جۋرناليست وراز الىمبەك تە كوتەرىپ، زايىرلى مەملەكەتتىڭ ءدىني ۇيىمدى قارجىلاندىرۋى زاڭسىز ەكەنىن مالىمدەدى.
تۇركىستان وبلىستىق ءبىلىم باسقارماسىنىڭ جاۋابىنا سايكەس، مەدرەسە جان باسىنا شاققانداعى نورماتيۆ بويىنشا قارجىلاندىرىلادى. 2024-2025 وقۋ جىلىندا وقۋ ورنىنا 175 مەملەكەتتىك گرانت بولىنگەن. 2025 جىلعى 5 قاڭتاردا ءبىلىم باسقارماسى مەن مەدرەسە اراسىندا 200 ملن تەڭگەدەن استام قارجىعا قىزمەت كورسەتۋ كەلىسىمشارتى جاسالعان. قارجى جىل بويى قىزمەت كورسەتۋ اكتىسىنە سايكەس اۋدارىلادى.
ساتىبالدى ءابىشۇلى – قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ءىنىسى. ول 1981 جىلى 34 جاسىندا جول اپاتىنان قازا بولعان. ونىڭ ۇلدارى قايرات ساتىبالدى مەن سامات ءابىش قازىر بەلگىلى تۇلعالار.
مەدرەسەنىڭ اشىلۋ سالتاناتىنا الەمنىڭ ءار تۇكپىرىنەن ون مىڭنان استام ادام قاتىسقان. ولاردىڭ قاتارىندا تۇركيا پرەزيدەنتى رەجەپ تايىپ ەردوعاننىڭ ۇلى ءبىلال ەردوعان، شەشەنستان باسشىسى رامزان قادىروۆتىڭ ءىنىسى امرۋددين ەديلگەرەۆ، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي سەرىكباي قاجى وراز، سونداي-اق وزبەكستان جانە قىرعىزستان مۇفتيلەرى بولعان.
قارجىنىڭ ناقتى قايدا جۇمسالعانى تۋرالى تولىق ەسەپ ءالى ۇسىنىلمادى.
