قازاقستاندا سۋ سالاسى ماماندارىن دايارلاۋ جەلىسىن كەڭەيتۋ جوسپارلانىپ وتىر. بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«بۇگىنگى تاڭدا بۇل باعىتتا ەلىمىزدىڭ ءتورت ماكرووڭىرى تاڭدالدى. وندا ەكونوميكا سالالارى بويىنشا، ونىڭ ىشىندە سۋ سالاسىنىڭ بولاشاق ماماندارىن دايارلايتىن تىرەك كوللەدجدەر قۇرىلاتىن بولادى»،—دەلىنگەن حابارلامادا.
2024-2025 جىلدارى «سۋمەن جابدىقتاۋ جانە سۋ بۇرۋ جۇيەلەرىنىڭ تازارتۋ قۇرىلىستارىن پايدالانۋ»، «گيدروتەحنيكالىق مەليوراتسيا» جانە «گيدروتەحنيكالىق قۇرىلىس» جانە تاعى دا باسقا ماماندىقتار بويىنشا تەحنيكالىق جانە كاسىپتىك ءبىلىم بەرۋدە مەملەكەتتىك ءبىلىم بەرۋ تاپسىرىسىن ۇلعايتۋ جوسپارلانۋدا.
«وڭتۇستىك ماكرووڭىردەگى تەحنيكالىق جانە كاسىپتىك ءبىلىم بەرۋدىڭ باس تىرەك ۇيىمى رەتىندە شىمكەنت قالاسىنداعى ماناپ وتەباەۆ اتىنداعى جاڭا تەحنولوگيالار جوعارى كوللەدجى تاڭدالدى. مۇندا «سۋمەن جابدىقتاۋ جانە سۋ بۇرۋ جۇيەلەرىنىڭ تازارتۋ قۇرىلىستارىن پايدالانۋ» ماماندىعى بويىنشا كادرلار دايارلانادى. ستۋدەنتتەرگە وندىرىستىك پراكتيكادان ءوتۋ مۇمكىندىگى بەرىلەدى، ال ارنايى پاندەر پەداگوگتەرى مەن وندىرىستىك وقىتۋ شەبەرلەرى ءۇشىن بىلىكتىلىكتى ارتتىرۋ كۋرستارىن وتكىزۋ جوسپارلانۋدا. سونداي-اق، وندىرىستەن ماماندار تارتۋدى جوسپارلاپ وتىرمىز»، - دەدى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆ.
ايتا كەتەيىك، بۇگىندە ەلىمىزدىڭ بەس كوللەدجى سۋ سالاسىنىڭ ماماندارىن دايارلايدى.
