Satybaldy Äbışūly atyndaǧy Saryaǧaş medrese-kolledjıne 2018 jyldan berı memleketten 1,9 milliard teŋgeden astam qarjy bölıngen. Alaida būl qarajattyŋ qalai jūmsalyp jatqany qoǧamda sūraq tudyryp otyr, dep habarlaidy “Adyrna” ūlttyq portaly.
Orda.kz saitynyŋ zertteuıne säikes, Türkıstan oblystyq bılım basqarmasy būl dıni mekemege jyl saiyn 200 million teŋgeden astam qarjy bölıp keledı. Memleket dınge aralaspaidy degen qaǧidatqa qaramastan, zaŋ boiynşa kez kelgen bılım beru ūiymy memlekettık grant ala alady.
Jyldar boiynşa bölıngen qarjy:
•2018 jyly – 336,08 mln teŋge
•2019 jyly – 400,23 mln teŋge
•2020 jyly – 137,96 mln teŋge
•2021 jyly – 54,47 mln teŋge
•2022 jyly – 143,90 mln teŋge
•2023 jyly – 296,35 mln teŋge
•2024 jyly – 280,03 mln teŋge
•2025 jyly – 290,89 mln teŋge
Būl mäselenı jurnalist Oraz Älımbek te köterıp, zaiyrly memlekettıŋ dıni ūiymdy qarjylandyruy zaŋsyz ekenın mälımdedı.
Türkıstan oblystyq bılım basqarmasynyŋ jauabyna säikes, medrese jan basyna şaqqandaǧy normativ boiynşa qarjylandyrylady. 2024-2025 oqu jylynda oqu ornyna 175 memlekettık grant bölıngen. 2025 jylǧy 5 qaŋtarda bılım basqarmasy men medrese arasynda 200 mln teŋgeden astam qarjyǧa qyzmet körsetu kelısımşarty jasalǧan. Qarjy jyl boiy qyzmet körsetu aktısıne säikes audarylady.
Satybaldy Äbışūly – Qazaqstannyŋ tūŋǧyş prezidentı Nūrsūltan Nazarbaevtyŋ ınısı. Ol 1981 jyly 34 jasynda jol apatynan qaza bolǧan. Onyŋ ūldary Qairat Satybaldy men Samat Äbış qazır belgılı tūlǧalar.
Medresenıŋ aşylu saltanatyna älemnıŋ är tükpırınen on myŋnan astam adam qatysqan. Olardyŋ qatarynda Türkiia prezidentı Rejep Taiyp Erdoǧannyŋ ūly Bıläl Erdoǧan, Şeşenstan basşysy Ramzan Qadyrovtyŋ ınısı Amruddin Edilgerev, Qazaqstan mūsylmandary dıni basqarmasynyŋ töraǧasy, bas müfti Serıkbai qajy Oraz, sondai-aq Özbekstan jäne Qyrǧyzstan müftilerı bolǧan.
Qarjynyŋ naqty qaida jūmsalǧany turaly tolyq esep älı ūsynylmady.
Ūqsas jaŋalyqtar
