وزبەكستاننىڭ سىرتقى ىستەر مينيسترلىگى اقش-تان باسقا ەلدەرگە زاڭسىز ميگرانتتاردىڭ دەپورتاتسيالانۋ جاعدايىن باقىلاۋدا ۇستاپ وتىر جانە ءوز ازاماتتارىنا قاي جەردە بولسا دا كومەك كورسەتۋگە دايىن. بۇل تۋرالى وزبەكستان ءسىم ءباسپاسوز حاتشىسى احرور بۋرحانوۆ مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، وزبەكستاننىڭ ۆاشينگتونداعى ەلشىلىگى مەن نيۋ-يوركتەگى باس كونسۋلدىعى اقش-تىڭ قۇقىق قورعاۋ ورگاندارىمەن تىعىز بايلانىستا جۇمىس ىستەپ، ورتالىق ازيا ەلىنىڭ ازاماتتارىن قاۋىپسىز تۇردە ەلىنە قايتارۋدى قامتاماسىز ەتۋدە.
بۋرحانوۆتىڭ مالىمدەۋىنشە، مينيسترلىك اقش-تان باسقا ەلدەرگە دەپورتاتسيالىق رەيستەرگە مۇقيات باقىلاۋ جۇرگىزۋدە. وزبەك ديپلوماتتارى بۇل ماسەلە بويىنشا اقش بيلىگىمەن جانە لاتىن امەريكاسى ەلدەرىنىڭ وكىلدەرىمەن تۇراقتى بايلانىستا.
ەسكە سالا كەتەيىك، كەشە اقش-تىڭ جاڭا كوشى-قون ساياساتى اياسىندا دەپورتاتسيالانعان ميگرانتتاردى ءۇشىنشى ەلدەرگە جىبەرۋ تاجىريبەسى باستالدى. العاشقى توپ، ونىڭ ىشىندە قازاقستان، وزبەكستان، قىتاي، ارمەنيا، تۇركيا، اۋعانستان، رەسەي، گرۋزيا، ۆەتنام، ازەربايجان، يران، يوردانيا جانە گانا ازاماتتارى اقش-تان دەپورتاتسيالانىپ، ۋاقىتشا كوستا-ريكادا ورنالاستىرىلدى. بۇل ۆاشينگتون مەن سان-حوسە اراسىنداعى كەلىسىم ناتيجەسىندە جۇزەگە اسىرىلدى. كەلىسىم بويىنشا، كوستا-ريكا اۋماعىندا 200-گە دەيىن دەپورتاتسيالانعان ميگرانت ۋاقىتشا تۇرا الادى.
قازاقستاننىڭ سىرتقى ىستەر مينيسترلىگى اقش-تان دەپورتاتسيالانعان ازاماتتارعا قانداي كومەك كورسەتەتىنىن اشىق مالىمدەمەگەن. كونسۋلدىق قولداۋ كورسەتىلە مە، قارجىلاي كومەك قاراستىرىلا ما، ەلگە ورالعان ازاماتتارعا الەۋمەتتىك بەيىمدەلۋ باعدارلاماسى ازىرلەنە مە – بۇل سۇراقتاردىڭ جاۋابى ازىرگە بەلگىسىز.
