وڭتۇستىك كورەيا اسكەري-اۋە كۇشتەرىنىڭ ەكى KF-16 جويعىش ۇشاعى وقۋ-جاتتىعۋ كەزىندە قاتەلەسىپ، جاتتىعۋ الاڭىنىڭ ورنىنا جاقىن ماڭداعى اۋىلعا سەگىز بومبا تاستاعان. سونىڭ سالدارىنان 15 ادام جاراقات الدى، دەپ حابارلايدى "ادىرنا" ۇلتتىق پورتالى Yonhap-قا سىلتەپ.
وقيعا سەۋلدەن 40 شاقىرىم جەردەگى پحوچحون اۋىلىندا تاڭعى ساعات 10 شاماسىندا بولعان. جارىلىستاردان شىركەۋ مەن جەتى عيماراتقا زاقىم كەلگەن. جارالانعاندار اراسىندا ەكى سارباز بەن ەكى شەتەلدىك ازامات بار.
ءورت سوندىرۋشىلەر بەتى مەن يىعىنان اۋىر جاراقات العان ەكى ادامدى اۋرۋحاناعا جەتكىزدى. دارىگەرلەر ولاردىڭ ومىرىنە قاۋىپ جوق ەكەنىن مالىمدەدى. تاعى سەگىز تۇرعىن جەڭىل جاراقات الىپ، مەديتسينالىق كومەككە جۇگىنگەن. بيلىك زارداپ شەككەندەر سانى ارتۋى مۇمكىن ەكەنىن بولجاپ وتىر.
قاۋىپسىزدىك ماقساتىندا اۋىلدىڭ 50-گە جۋىق تۇرعىنى ەۆاكۋاتسيالاندى. وڭتۇستىك كورەيا اۋە كۇشتەرى بەيبىت تۇرعىندارعا زيان كەلگەنىنە كەشىرىم سۇراپ، اپاتتى شتاب باستىعىنىڭ ورىنباسارى گەنەرال-لەيتەنانت پاك كي ۆاننىڭ باسشىلىعىمەن تەرگەۋ جۇرگىزىلىپ جاتقانىن حابارلادى.
ء"بىز بەيبىت تۇرعىندارعا تيگىزگەن زالالىمىز ءۇشىن وكىنىش بىلدىرەمىز جانە جارالانعانداردىڭ تەزىرەك ساۋىعىپ كەتۋىن تىلەيمىز. بارلىق قاجەتتى شارالار قابىلدانىپ، كەلتىرىلگەن شىعىن وتەلەدى", – دەلىنگەن اۋە كۇشتەرى تاراتقان مالىمدەمەدە.
ايتا كەتەيىك، جاتتىعۋعا 160-تان استام اسكەري تەحنيكا، سونىڭ ىشىندە ك2 تانكتەرى، K55A1 گاۋبيتسالارى، شابۋىلداۋشى تىكۇشاقتار جانە F-35A جويعىش ۇشاقتارى قاتىسقان.
