ءماجىلىس دەپۋتاتى داۋلەت مۇقاەۆ مەكتەپ وقۋشىلارىنا ChatGPT سەكىلدى جاساندى ينتەللەكتى قولدانۋعا شەكتەۋ قويۋدى ۇسىندى، دەپ حابارلايدى «ادىرنا» ءتىلشىسى.
ول بۇگىندە ءبىلىم الۋشىلاردىڭ كوپشىلىگى تاپسىرمالاردى ورىنداۋدىڭ ورنىناونى Chat GPT-گە سالىپ، دايىن جاۋاپ الۋدى ادەتكە اينالدىرعانىن مالىمدەدى.
«ارينە، تەحنولوگيانىڭ دامىعانى جاقسى. بىراق ۋاقىت وتە كەلە، بۇنىڭ بارلىعى مي جۇمىسىنىڭ شەكتەلۋىنە الىپ كەلەتىن سياقتى. قازىردىڭ وزىندە مەكتەپ وقۋشىلارى تاپسىرمانى جاساندى ينتەللەكت – ChatGPT-گە سالا سالادى دا، وزدىگىمەن ەشتەڭە ىستەمەي، وتىرا بەرەدى. مەنىڭشە، مەكتەپ وقۋشىلارى ءۇشىن قانداي ءبىر شەكتەۋلەر قويۋ كەرەك. ەگەر ول شەكتەۋدى قويماسا، ەرتەڭ سول وقۋشىلارىمىز ستۋدەنت بولادى، ەڭبەك نارىعىنا ارالاسادى. سونىڭ زاردابىن 20 جىلدان كەيىن كورەمىز. بۇل دا ءبىزدىڭ ەلىمىز ءۇشىن ۇلكەن ءبىر قاۋىپتىڭ ءبىرى»،- دەدى مۇقاەۆ.
ايتا كەتەيىك، بۇگىن ماجىلىستە «جاساندى ينتەللەكت تۋرالى» زاڭ جوباسى تانىستىرىلعان بولاتىن. زاڭ جوبالارى جاساندى ينتەللەكت تەحنولوگيالارىن جانە جۇيەلەرىن پايدالانۋدىڭ بىرىڭعاي قۇقىقتىق بازاسىن بەلگىلەۋگە باعىتتالعان.
