رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين ماسلەنيتسا مەيرامىن تويلاۋعا جينالعان استانالىقتارعا الدەبىر «جەڭىس» تۋرالى ايتقان، دەپ حابارلايدى «ادىرنا» ءتىلشىسى.
«1945 جىلعى جەڭىس سەكىلدى، ءبارىمىز جەڭىستى تاعاتسىزدانا كۇتىپ ءجۇرمىز. بالكىم، ول جاعداي جاقىن ارادا ورىندالادى»،—دەدى ەلشى.
بەينەجازبانى الەۋمەتتىك جەلىگە جۋرناليست راۋل ۋپوروۆ جاريالادى. ايتۋىنشا، سلاۆيانداردىڭ ءداستۇرلى مەيرامى ەلورداداعى ۋسپەنسك سبورىنىڭ اۋماعىندا وتكىزىلگەن.
الەكسەي بوروداۆكيننىڭ بۇل مالىمدەمەسى قازنەت قولدانۋشىلارىنىڭ نارازىلىعىن تۋدىردى.
«ءىس-شارا بارىسىن باقىلايتىن پوليتسيا قايدا؟»، «ەلشىنى ۇيىنە قايتارۋ كەرەك!»، «اكىمشىلىك جاۋاپقا تارتىلۋى كەرەك»،—دەپ جازدى ولار.
قولدانۋشىلاردىڭ ءبىر توبى ونى سىرتقى ىستەر مينيسترلىگىنە شاقىرتۋدى ۇسىنعان. ازىرگە مينيسترلىك ەشقانداي رەاكتسيا بىلدىرگەن جوق. ادەتتە مۇندايدا سىرتقى ساياسات مەكەمەسى ەلشىنى شاقىرتىپ، نارازىلىق نوتاسىن تابىس ەتەتىن.
ايتا كەتەيىك، الەكسەي بوروداۆكين رەسەيدىڭ قازاقستانداعى توتەنشە جانە وكىلەتتى ەلشىسى قىزمەتىنە 2018 جىلى تاعايىندالعان بولاتىن. ول - قازاقستاندا ەڭ ۇزاق وتىرعان ەلشىلەردىڭ ءبىرى.
2022 جىلى ەلشىنىڭ قازاقستانداعى ورىس تىلىنە قاتىستى پىكىرى دە كوپشىلىكتىڭ نارازىلىعىن تۋدىرعان ەدى.
«ءاربىر قازاقستاندىق ەكى اياعىن نىق باسۋى ءۇشىن ەكى ءتىلدى مەڭگەرۋى كەرەك: مەملەكەتتىك ءتىل – قازاق ءتىلى جانە رەسمي ءتىل – ورىس ءتىلى. بۇل قازاقستان كونستيتۋتسياسىندا ايتىلعان»، - دەگەن ەدى ول سول كەزدە «روسسيا سەگودنيا» اگەنتتىگىنە بەرگەن سۇقباتىندا.
