قازاقستاننىڭ اۋىلدىق جەرلەرىندەگى بالالار مەن جاسوسپىرىمدەردى سپورتقا باۋلۋ جانە بۇقارالىق سپورتتى دامىتۋ باعىتىندا جاڭا قادام جاسالدى. تيمۋر جانە دينارا قۇلىباەۆتار نەگىزىن قالاعان Halyk قايىرىمدىلىق قورى مەن “قازاقستاننىڭ كاراتە فەدەراتسياسىنىڭ وداعى” زتب اراسىندا ىنتىماقتاستىق تۋرالى مەموراندۋمعا قول قويىلدى.
بۇل كەلىسىم اۋىلدىق ايماقتارداعى سپورت ينفراقۇرىلىمىن جاقسارتۋعا, اۋىل بالالارى مەن جاسوسپىرىمدەرىن سپورتقا باۋلۋعا، بۇقارالىق سپورتتى دامىتۋعا, سونداي-اق اۋىلدىق جاتتىقتىرۋشىلاردىڭ بىلىكتىلىگىن ارتتىرۋعا باعىتتالعان. سونىمەن قاتار، بۇل باستاما جاس سپورتشىلاردى قولداۋعا, ولاردىڭ الەۋەتىن دامىتۋعا جانە سپورتتىق باستامالاردى بىرلەسىپ جۇزەگە اسىرۋعا مۇمكىندىك بەرەدى. قۇجاتقا Halyk قورىنىڭ اتقارۋشى ديرەكتورى جاقسىلىقوۆ عالىمبەك جاقسىلىقۇلى جانە "قازاقستاننىڭ كاراتە فەدەراتسياسىنىڭ وداعى" زتب باس حاتشىسى مولداعالي اسقار قول قويدى.
بۇگىندە ەلىمىزدىڭ كوپتەگەن اۋىلدىق ايماقتارىندا سپورت ينفراقۇرىلىمىنىڭ جەتكىلىكسىزدىگى، جاتتىقتىرۋشىلار مەن تورەشىلەردىڭ تاپشىلىعى بايقالادى. وسى تۇرعىدان العاندا، AUYL SPORT جوباسى – اۋىل جاستارىنىڭ سپورتقا دەگەن قىزىعۋشىلىعىن ارتتىرىپ، ولاردىڭ سالاۋاتتى ءومىر سالتىن ۇستانۋىنا ىقپال ەتەتىن ماڭىزدى باستاما.
كاراتە فەدەراتسياسىمەن ارىپتەستىك – جوبانىڭ دامۋىنا تىڭ سەرپىن بەرەدى
"قازاقستاننىڭ كاراتە فەدەراتسياسىنىڭ وداعى" – ەلىمىزدەگى جەتەكشى سپورتتىق ۇيىمداردىڭ ءبىرى. ونىڭ اۋىل سپورتىنىڭ دامۋىنا اتسالىسۋى كاراتە سپورتىن وڭىرلەردە كەڭىنەن تاراتۋعا، جاس سپورتشىلارعا تاجىريبەلى جاتتىقتىرۋشىلاردان ءتالىم الۋعا، سونداي-اق حالىقارالىق ستاندارتتارعا ساي سپورتتىق ءىس-شارالار ۇيىمداستىرۋعا مۇمكىندىك بەرەدى.
"بۇگىن كاراتە فەدەراتسياسىمەن جاسالعان مەموراندۋم – AUYL SPORT جوباسىنىڭ ودان ءارى دامۋىنا زور ۇلەس قوساتىنىنا سەنەمىن. بۇل سەرىكتەستىك اۋىلدىق جەرلەردە سپورتتىڭ دامۋىنا تىڭ سەرپىن بەرىپ، جاس سپورتشىلارعا جاڭا مۇمكىندىكتەر اشادى", – دەدى Halyk قورىنىڭ اتقارۋشى ديرەكتورى جاقسىلىقوۆ عالىمبەك جاقسىلىقۇلى.
بۇل مەموراندۋم ەلىمىزدەگى بۇقارالىق سپورتتى دامىتۋ مەن قايىرىمدىلىق مادەنيەتىن نىعايتۋعا باعىتتالعان ماڭىزدى قادام. قۇجاتقا قول قويعان تاراپتار الداعى ۋاقىتتا ىنتىماقتاستىقتى تەرەڭدەتىپ، اۋىلدىق سپورتتىڭ قولجەتىمدىلىگىن ارتتىرۋ ءۇشىن بىرلەسە جۇمىس ىستەيتىندەرىن مالىمدەدى.
ەسكە سالايىق، AUYL SPORT جوباسى 2024 جىلى وبلىستىق دەڭگەيدەگى تۋرنيرلەردەن باستاۋ الدى. وعان 200 اۋىلدان 12 مىڭنان استام بالا مەن ءجاسوسپىرىم قاتىسىپ، سپورتقا دەگەن قىزىعۋشىلىقتارىن تانىتتى. كاراتە – جوبا اياسىندا قامتىلعان التى سپورت ءتۇرىنىڭ ءبىرى. جوبانىڭ رەسپۋبليكالىق ءتۋرنيرىنىڭ فينالى ەلىمىزدىڭ 17 وبلىسىنان 1300-دەن استام جاس سپورتشىنى بىر الاڭدا توعىستىرىپ، اۋىل سپورتىن جاڭا دەڭگەيگە كوتەردى.
Halyk قايىرىمدىلىق قورى – ەلىمىزدىڭ تۇكپىر-تۇكپىرىندەگى مۇقتاج جانداردى قولداۋعا جانە حالىقتىڭ ءومىر ءسۇرۋ ساپاسىن جاقسارتۋعا باعىتتالعان الەۋمەتتىك باستامالارعا ۇدايى قولداۋ كورسەتىپ كەلە جاتقان ءىرى ۇيىم. قور اۋىلداعى سپورتتى دامىتۋعا 500 ميلليون تەڭگەگە جۋىق قارجى ءبولدى. سونىمەن قاتار، وسى كۇنگە دەيىن 120-دان استام الەۋمەتتىك جوبانى جۇزەگە اسىرىپ، وعان 85 ميلليارد تەڭگە كولەمىندە قاراجات جۇمسادى.
AUYL SPORT جوباسى – اۋىل سپورتىنىڭ جاڭا دەڭگەيگە كوتەرىلۋىنە ىقپال ەتىپ، بولاشاق چەمپيونداردىڭ شىعۋىنا مۇمكىندىك بەرەدى! تيمۋر قۇلىباەۆتىڭ بۇل باستاماسى اۋىل بالالارىنا سپورت ارقىلى جاڭا مۇمكىندىكتەر سىيلاۋعا دەگەن ۇمتىلىسىنىڭ جارقىن كورىنىسى.
