مەملەكەت باسشىسى قاسىم-جومارت توقاەۆ «تۇركىستان قالاسىنىڭ ەرەكشە مارتەبەسى تۋرالى» قازاقستان رەسپۋبليكاسىنىڭ زاڭىنا قول قويدى. بۇل تۋرالى بۇگىن، 3 ناۋرىزدا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
زاڭدا ەلىمىزدىڭ رۋحاني، تاريحي-مادەني، تۋريستىك ورتالىعى جانە ساۋلەت مۇراسى رەتىندەگى تۇركىستان قالاسىنىڭ ەرەكشە مارتەبەسى بەكىتىلگەن.
«قۇجات قالانىڭ تاريحي-مادەني ەسكەرتكىشتەرى مەن نىساندارىن باسقارۋدىڭ، ساقتاۋدىڭ جانە تۇتاستىعىن قامتاماسىز ەتۋدىڭ ءتيىمدى جۇيەسىن قۇرۋعا; قوجا احمەت ياساۋي كەسەنەسى مەن ونىڭ قورعاۋ ايماعىنداعى ەسكەرتكىشتەرگە ارحەولوگيالىق جانە عىلىمي-رەستاۆراتسيالىق جۇمىستاردى جوسپارلاۋعا جانە باسقارۋعا; تاريحي-مادەني مۇرانى ساقتاۋعا، دامىتۋعا، قايتا جاڭعىرتۋعا جانە ۇلتتىق قولونەردى دارىپتەۋگە; قالانىڭ تاريحي-مادەني نىساندارىن قورعاۋ جانە پايدالانۋ جونىندە قابىلدانعان شەشىمدەردى عىلىمي تۇرعىدان قامتاماسىز ەتۋگە باعىتتالعان»،—دەلىنگەن حابارلامادا.
قالانىڭ دامۋىن ءتيىمدى باسقارۋ ءۇشىن تۇركىستان قالاسىنىڭ اكىمدىگى مەن ءماسليحاتىنا قوسىمشا وكىلەتتىكتەر بەرىلدى. بۇل شەشىم قابىلداۋ ۇدەرىسىن جەدەلدەتۋگە، تاريحي-مادەني مۇرا نىساندارىن ساقتاۋعا باقىلاۋدى جاقسارتۋعا، قالانىڭ بىرىڭعاي جوبالىق كودەكسىن ەنگىزۋگە مۇمكىندىك بەرەدى.
ءوز كەزەگىندە مەملەكەتتىك باقىلاۋ قولونەرشىلەردى قولداۋدى، ترانزيتتىك كولىكتى رەتتەۋدى جانە قالانىڭ تاريحي بولمىسىن ساقتاۋدى قامتاماسىز ەتەدى.
