Memleket basshysy Qasym-Jomart Toqaev «Túrkistan qalasynyń erekshe mártebesi týraly» Qazaqstan Respýblıkasynyń Zańyna qol qoıdy. Bul týraly búgin, 3 naýryzda Aqordanyń baspasóz qyzmeti jazdy, dep habarlaıdy «Adyrna» tilshisi.
Zańda elimizdiń rýhanı, tarıhı-mádenı, týrıstik ortalyǵy jáne sáýlet murasy retindegi Túrkistan qalasynyń erekshe mártebesi bekitilgen.
«Qujat qalanyń tarıhı-mádenı eskertkishteri men nysandaryn basqarýdyń, saqtaýdyń jáne tutastyǵyn qamtamasyz etýdiń tıimdi júıesin qurýǵa; Qoja Ahmet Iasaýı kesenesi men onyń qorǵaý aımaǵyndaǵy eskertkishterge arheologııalyq jáne ǵylymı-restavraııalyq jumystardy josparlaýǵa jáne basqarýǵa; tarıhı-mádenı murany saqtaýǵa, damytýǵa, qaıta jańǵyrtýǵa jáne ulttyq qolónerdi dáripteýge; qalanyń tarıhı-mádenı nysandaryn qorǵaý jáne paıdalaný jóninde qabyldanǵan sheshimderdi ǵylymı turǵydan qamtamasyz etýge baǵyttalǵan»,—delingen habarlamada.
Qalanyń damýyn tıimdi basqarý úshin Túrkistan qalasynyń ákimdigi men máslıhatyna qosymsha ókilettikter berildi. Bul sheshim qabyldaý úderisin jedeldetýge, tarıhı-mádenı mura nysandaryn saqtaýǵa baqylaýdy jaqsartýǵa, qalanyń biryńǵaı jobalyq kodeksin engizýge múmkindik beredi.
Óz kezeginde memlekettik baqylaý qolónershilerdi qoldaýdy, tranzıttik kólikti retteýdi jáne qalanyń tarıhı bolmysyn saqtaýdy qamtamasyz etedi.
