اقتوبەدە جەتى جاسار بالاعا يت شابۋىلداپ، جۇرەگى شىداماي كوز جۇمدى. قايعىلى وقيعا مارەسەۆ كوشەسىندەگى ءۇيدىڭ اۋلاسىندا بولعان. 1 سىنىپ وقۋشىسىنىڭ دەنەسىن اناسى ۇيىنەن بىرنەشە قادام جەردە تاۋىپ العان، دەپ حابارلايدى "ادىرنا" ۇلتتىق پورتالى كتك ارناسىنا سىلتەمە جاساپ.
ءانۋار ەسىمدى وقۋشى تاڭەرتەڭ اناسىمەن بىرگە ۇيدەن شىققان. اناسى ەسىكتى قۇلىپتاپ جاتقاندا، بالا ودان بۇرىن شىعىپ كەتكەن. وسى ساتتە قوقىس كونتەينەرىنىڭ جانىندا تۇرعان يت ونىڭ ۇستىنە سەكىرگەن.
"قورقىنىشتان ۇلىمنىڭ جۇرەگى جارىلىپ كەتتى. ايەلىم مۇنىڭ ءبارىن كورىپ تۇردى. قىزىم دا كوردى. كەيىن ءيتتى الىپ كەتتى", – دەدى مارقۇمنىڭ اكەسى.
مەكتەپ ديرەكتورىنىڭ ايتۋىنشا، ساعات 8:00-دە سىنىپ جەتەكشىسى ساباققا كەلمەگەن وقۋشىلاردى تۇگەندەپ، ءانۋاردىڭ اناسىمەن بايلانىسقا شىققان. بىرنەشە قوڭىراۋدان كەيىن اناسى بالاسىنىڭ قايتىس بولعانىن حابارلاعان.
"اناسى جىلاپ تۇردى. "بالام قۇلاپ قالدى، مەن كومەكتەسە المادىم" دەدى. قاتتى ەسەڭگىرەپ قالعان ەدى", – دەيدى №16 مەكتەپتىڭ ديرەكتورى ەلۆيرا عالىموۆا.
اقتوبە وبلىستىق دەنساۋلىق ساقتاۋ باسقارماسىنىڭ باسشىسى ءاليا شارباقوۆا جەدەل جاردەم وقيعا ورنىنا 5 مينۋتتا جەتكەنىن، بىراق كەلگەن ساتتە بالا كلينيكالىق ءولىم جاعدايىندا بولعانىن ايتتى. 30 مينۋت بويى رەانيماتسيالىق شارالار جۇرگىزىلگەنىمەن، ناتيجە بولماعان.
پوليتسيا وقيعاعا يت سەبەپ بولۋى مۇمكىن ەكەنىن جوققا شىعارمايدى، بىراق ءالى ناقتى اقپارات بەرمەدى.
"بەينەكامەرا جازبالارى زەرتتەلىپ جاتىر، كۋاگەرلەردەن جاۋاپ الىنادى. بالانىڭ دەنەسىنەن زورلىق-زومبىلىق بەلگىلەرى تابىلعان جوق. قازىر سوت-مەديتسينالىق ساراپتاما تاعايىندالدى", – دەدى اقتوبە وبلىستىق ءىىد تەرگەۋ باسقارماسىنىڭ باستىعى باۋىرجان اساۋوۆ.
بەلگىلى بولعانداي، مارقۇم ءانۋاردىڭ اتا-اناسى اجىراسقان. اناسى بىلتىر قاندىاعاشتان اقتوبەگە كوشىپ كەلگەن. وتباسىدا ەكى بالا بولعان، ەندى تەك قىزى عانا قالدى.
