اقتوبەدە سەگىزىنشى سىنىپ وقۋشىسى وزىنەن ءبىر-ەكى جاس ۇلكەن وقۋشىلاردىڭ قولىنان قازا تاپقان، دەپ حابارلايدى "ادىرنا" ءتىلشىسى كتك تەلەارناسىنا سىلتەپ.
بالانىڭ بۋىنداستارىنىڭ قولىنان قازا تاپقانىن كۋاگەرلەر دە، ساراپتاما دا راستاپ وتىر. قازىر كۇدىككە ىلىنگەن بالالار قاماۋدا.
11 ءساۋىر كۇنى قايتىس بولعان بالانىڭ ولىمىنە قاتىستى قىلمىستىق ءىس ءۇش باپ بويىنشا قوزعالعان. تەك بەكسۇلتاندى ۇرىپ ولتىرگەن جوعارى سىنىپ وقۋشىلارى عانا ەمەس، ءبىلىم وشاعىنىڭ وكىلدەرى دە جاۋاپقا تارتىلاتىن بولادى.
ال پەرزەنتىنەن ايىرىلعان اتا-انا جاۋىزدىققا بارعان جاسوسپىرىمدەردى دە، العاشىندا قىلمىستى بارىنشا جاسىرعان ءبىلىم وشاعىنىڭ باسشىلارىن دا قاتاڭ جازالاۋدى سۇرايدى.
"بىراق مىنا بالالار جازاسىن السا ەكەن. جالعىز بالالار ەمەس، وسى جەردەگى تومەنگىلەردەن باستاپ، جوعارعىسىنا دەيىن جازالانسا ەكەن. نەگە بۇنىڭ ۇستىنەن ءىس قوزعامايدى؟ نەگە قارالمايدى؟ نەگە ءتارتىپ جوق؟ ءتارتىپ جوق جەردە ءبىلىم بولا ما؟” – دەيدى مارقۇم بەكسۇلتاننىڭ اناسى زويا بازارباەۆا.
قايتىس بولعان بەكسۇلتان ابۋباكىر ەركىن كۇرەستەن سپورت شەبەرى بولعان. ول ەگىزىمەن بىرگە سپورت مەكتەبىندە سەگىزىنشى سىنىپتا وقىعان. ال وتباسىنا قايعىلى وقيعانىڭ قالاي بولعانىن بەكسۇلتاننىڭ سىڭارى بايانداعان.
"ۇرعان. ءبىر-ءبىر جۇدىرىقپەن ۇرعان، توسىنەن. شاپالاقتاعان. مەنىڭ بالام بەكسۇلتان شەتتە تۇرعان. ەسىكتىڭ قاسىندا تۇرعاندا شاپالاقپەن بەتىنەن ۇرعان كەزدە، شاپالاقتان ەڭكەيمەي مە، سول كەزدە ميرلان دەگەن بالا، ونىنشى سىنىپتاعى بالا تىزەسىمەن نە قىلعان. تىزە تيگەننەن كەيىن، بالا بىلاي، ەسىككە قاراي قۇلاعانى دالىزدەگى بەينەكامەراعا ءتۇسىپ قالعان”، – دەيدى بەكسۇلتاننىڭ اكەسى قايرات قالنازاروۆا.
مەكتەپتەگى الىمجەتتىكتى باسقا وقۋشىلار دا جارىسا ايتقان كورىنەدى. بەلگىلى بولعانداي جوعارى سىنىپ وقۋشىلارى كۇندەلىكتى دونەر الۋ ءۇشىن اقشا سۇراپ، جاتاقحاناداعى بولمەلەردى دە جۇدىرىقتاتىپ جيناتىپ جۇرگەن.
ال الىمجەتتىك تۋرالى جاق اشپاعان ءبىلىم وشاعىنىڭ ديرەكتورى ول كەزدە "توبەلەس بولعانىن بىلمەدىم" دەپ وتىر.
"باقىلاۋسىز دەگەندە، تۇنگى كەزەكشىلىكتەگى تاربيەشى سول قاباتتا بولعان. بىراق سول بالالار سول بولمەگە كىرىپ كەتكەنىن كورمەي قالعان. مۇعالىمدەرگە تەرگەۋ ەندى ءجۇرىپ جاتىر. تاربيەشىلەرى، جاتتىقتىرۋشىلارى، ورىنباسارى”، – دەيدى ەسەت باتىر اتىنداعى وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرناتىنىڭ ديرەكتورى قايرات اجباعامبەتوۆ.
