ۋكراينا پرەزيدەنتى ۆلاديمير زەلەنسكي اقش پرەزيدەنتى دونالد ترامپپەن وتكەن ءساتسىز كەلىسسوزدەردەن كەيىن فرانتسيا پرەزيدەنتى ەممانۋەل ماكرونمەن جانە ناتو-نىڭ باس حاتشىسى مارك ريۋتتەمەن تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى.
بۇل تۋرالى Financial Times باسىلىمىنىڭ ءجۋرناليسى كريستوفەر ميللەر دەرەككوزدەرگە سىلتەمە جاساپ حابارلادى.
الايدا، تاراپتار اراسىندا ناقتى نە تالقىلانعانى بەلگىسىز. دەگەنمەن Financial Times باسىلىمىنىڭ مالىمەتىنشە، ماكرونمەن سويلەسكەننەن كەيىن زەلەنسكي ناتو باس حاتشىسىمەن دە بايلانىسقا شىققان.
بۇعان دەيىن مارك ريۋتتە سولتۇستىك اتلانتيكالىق اليانستىڭ ۋكرايناعا "ميللياردتاعان ەۋرو" كولەمىندەگى جاڭا كومەك پاكەتىن ازىرلەپ جاتقانىن مالىمدەگەن ەدى. بۇل تۋرالى ول ترامپپەن تەلەفون ارقىلى سويلەسكەننەن كەيىن حابارلادى. ونىڭ ايتۋىنشا، اڭگىمە "وتە جاقسى" وتكەن.
28 اقپاندا ۆاشينگتونداعى اق ۇيدە اقش پەن ۋكراينا پرەزيدەنتتەرى كەزدەستى. كەزدەسۋ بارىسىندا ەكى ەل اراسىندا پايدالى قازبالار جونىندەگى كەلىسىم جاسالۋى ءتيىس بولاتىن. الايدا، كەلىسسوزدەر قىزۋ پىكىرتالاسقا ۇلاسىپ، زەلەنسكي مەن ترامپ اراسىندا كەلىسپەۋشىلىك تۋىندادى. ۋكراينا پرەزيدەنتى ترامپ پەن اقش ۆيتسە-پرەزيدەنتى دجەي دي ۆەنسپەن ءسوز تالاستىرىپ، كەزدەسۋدى مەرزىمىنەن بۇرىن اياقتادى. ناتيجەسىندە كەلىسىمگە قول قويىلمادى.
كەزدەسۋ بارىسىندا ترامپ زەلەنسكيدى بىرنەشە رەت "العىس بىلدىرمەۋدە" ايىپتادى.
ء"سىز ءۇشىنشى دۇنيەجۇزىلىك سوعىستى تۋدىرۋىڭىز مۇمكىن. ءسىزدىڭ جاساپ وتىرعان ارەكەتىڭىز ءسىزدى قولداعان ەلگە قۇرمەتسىزدىك كورسەتۋمەن تەڭ", – دەپ مالىمدەدى ترامپ. سونداي-اق، ول ەگەر ۋكراينا كەلىسىمگە قول قويماسا، اقش بۇل پروتسەستەن شىعىپ كەتۋى مۇمكىن ەكەنىن ەسكەرتتى.
كەزدەسۋدەن كەيىن زەلەنسكي اقش-قا قولداۋ كورسەتكەنى ءۇشىن العىس ءبىلدىرىپ،
"ۋكرايناعا ءادىل ءارى بەرىك بەيبىتشىلىك قاجەت، ءبىز ءدال وسى ماقساتتا جۇمىس ىستەپ جاتىرمىز", – دەپ مالىمدەدى.
ترامپپەن كەلىسپەۋشىلىكتەن كەيىن زەلەنسكيگە كوپتەگەن ەۋروپالىق ساياساتكەرلەر، ونىڭ ىشىندە فرانتسيا پرەزيدەنتى ەممانۋەل ماكرون قولداۋ ءبىلدىردى.
"اگرەسسور – رەسەي. ال اگرەسسيا قۇربانى – ۋكراينا. ءبىز كومەكتەسكەندەردى باعالاۋىمىز كەرەك، بىراق ەڭ الدىمەن باسىنان باستاپ كۇرەسكەندەردى قۇرمەتتەۋىمىز قاجەت", – دەدى ماكرون.
