ۋكراينا پرەزيدەنتى ۆلاديمير زەلەنسكي 28 اقپاندا اقش-پەن كەلىسسوزدەر وتكىزۋدى جوسپارلاپ وتىر. بۇل كۇنى ول اقش پرەزيدەنتى دونالد ترامپپەن كەزدەسەدى دەپ كۇتىلۋدە. بۇل تۋرالى زەلەنسكي 26 اقپانداعى حالىققا ۇندەۋىندە مالىمدەدى، دەپ حابارلايدى "ادىرنا" ۇلتتىق پورتالى.
ء"بىزدىڭ كوماندالار اقش-پەن جۇمىس ىستەۋدە، ءبىز جۇما كۇنى كەلىسسوزدەرگە دايىندالىپ جاتىرمىز. بۇل – امەريكانىڭ قولداۋى، بەيبىتشىلىك پەن قاۋىپسىزدىك كەپىلدىگى. بۇل رەسەيدىڭ باسقا حالىقتاردىڭ ءومىرىن قيراتۋىن توقتاتۋدىڭ كىلتى. مەن ترامپپەن كەزدەسەمىن. ءبىز ءۇشىن امەريكا كومەگىنىڭ توقتاپ قالماۋى وتە ماڭىزدى. بەيبىتشىلىككە جەتۋ ءۇشىن كۇش قاجەت،" – دەدى ۋكراينا پرەزيدەنتى.
سول كۇنى ۋكراينا پرەمەر-ءمينيسترى دەنيس شمىگال كيەۆتىڭ اقش-پەن "قالپىنا كەلتىرۋ ينۆەستيتسيالىق قورى" جونىندە كەلىسىم جاساسۋعا دايىن ەكەنىن مالىمدەدى. بۇل قۇجات امەريكاعا ۋكراينانىڭ مينەرالدى رەسۋرستارىنا قول جەتكىزۋگە مۇمكىندىك بەرەدى.
اقش پرەزيدەنتى دونالد ترامپ بۇل كەلىسىمدى ۋكرايناعا بەرىلگەن كومەكتى وتەماقى رەتىندە قاراستىرىپ وتىر. بۇعان دەيىن زەلەنسكي بۇل قۇجاتتىڭ باستاپقى نۇسقاسىنا قول قويۋدان باس تارتقان بولاتىن. الايدا، 23 اقپاندا اقش پرەزيدەنتىنىڭ تاياۋ شىعىس جونىندەگى ارنايى وكىلى ستيۆ ۋيتكوفف CNN تەلەارناسىنا بەرگەن سۇحباتىندا ترامپ زەلەنسكيگە "حابارلاما" جىبەرگەنىن، ال قازىر ۋكراينا كوشباسشىسى كەلىسىمگە قول قويۋدان تايىنبايتىنىن مالىمدەدى.
كيەۆ كەلىسسوزدەر بارىسىندا ەۋروپالىق وداقتىڭ دا بەلسەندى قاتىسۋى ماڭىزدى ەكەنىن اتاپ ءوتتى.
