فرانتسيا پرەزيدەنتى ەممانۋەل ماكرون مەن ونىڭ زايىبى بريجيت ماكرون امەريكالىق بلوگەر كەنديس وۋەنسكە قارسى جالا جابۋ بويىنشا سوتقا ارىز ءتۇسىردى، دەپ حابارلايدى "ادىرنا" ۇلتتىق پورتالى BBC-گە سىلتەپ.
باس-اياعى 218 بەتتىك ارىز اقش-تىڭ دەلاۆەر شتاتىنداعى سوتقا جولدانعان. قۇجاتتا كەنديس وۋەنس تاراتقان اقپارات "ساندىراققا تولى، جالا جابۋعا باعىتتالعان جانە شىندىقتان مۇلدە الشاق" دەپ سيپاتتالادى.
الەۋمەتتىك جەلىلەردە ميلليونداعان جازىلۋشىسى بار تانىمال بلوگەر وۋەنس بريجيت ماكرون تۋرالى جىنىسىن اۋىستىردى دەگەن اقپارات تاراتقان. ول الەۋمەتتىك جەلىدە "بريجيتكە اينالۋ" اتتى بەينەروليكتەر سەرياسىن جاريالاعان بولاتىن.
ماكروننىڭ جان-جارى وۋەنسكە جالعان اقپاراتتى جوققا شىعارۋدى بىرنەشە رەت تالاپ ەتكەنىن حابارلادى. الايدا جاۋاپ بولماعاندىقتان، ماسەلەنى سوت ارقىلى شەشۋگە ءماجبۇر بولعان.
ارىز ماتىنىندە كەنديس وۋەنستىڭ جالعان مالىمدەمەلەردى ادەيى تاراتىپ، قوعام اراسىندا ناقتى ماقساتپەن جالا جابۋ ناۋقانىن باستاعانى كورسەتىلگەن. ول ءتىپتى ماكرون مەن ءبريجيتتىڭ تۋىستىق بايلانىسى بارىن، جانە ەممانۋەل ماكرون اقش-تىڭ ورتالىق بارلاۋ باسقارماسىنىڭ (CIA) سانانى باسقارۋ باعدارلاماسى ارقىلى بيلىككە كەلدى دەپ مالىمدەگەن.
"ەگەر بۇل جالا جابۋدىڭ ايقىن مىسالى بولماسا، وندا ونداي مىسال مۇلدە جوق", — دەدى ماكروندار وتباسىن سوتتا قورعايتىن ادۆوكات توم كلەر.
ايتا كەتەيىك، بۇعان دەيىن ەممانۋەل ماكرون بالالارعا الەۋمەتتىك جەلىلەردى پايدالانۋعا شەكتەۋ قويۋدى ۇسىنعان ەدى.
