الماتىداعى المالى اۋداندىق سوتىندا بەلسەندى امانتاي قاجىنىڭ ءىسى قارالىپ، ول اقتالىپ شىقتى، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
سوت وتىرىسىندا امانتاي قاجى ءوزىن كىناسىز دەپ اتاپ، ەشكىمدى يتەرمەگەنىن ايتتى.
ەسكە سالساق، شىلدە ايىندا الەۋمەتتىك جەلىلەردە امانتاي قاجىنىڭ ايەلدى باسپالداقتان يتەرىپ جىبەرگەن ءساتى تۇسىرىلگەن ۆيدەو تاراعان بولاتىن. سول كەزدە الەۋمەتتىك جەلىلەردە زارداپ شەككەن ايەلدىڭ جامباسى سىنعانى تۋرالى اقپارات پايدا بولدى.
العاشىندا تەرگەۋ قىلمىستىق كودەكستىڭ 107-بابى بويىنشا («دەنساۋلىققا قاساقانا ورتاشا اۋىرلىقتاعى زيان كەلتىرۋ») جۇرگىزىلگەن. الايدا 23 قىركۇيەكتەگى سوت وتىرىسىندا ايىپتاۋ قك-ءتىڭ 114-بابى، 3-بولىگى («ابايسىزدا اۋىر زيان كەلتىرۋ») بويىنشا قايتا سارالاندى.
دەگەنمەن، سوت بارىسىندا زارداپ شەككەن تاراپتىڭ امانتاي قاجىعا شاعىمى جوق ەكەنى بەلگىلى بولدى. سۋديا ەرنار قاسىمبەكوۆتىڭ ايتۋىنشا، ايەل مەدياتيۆتىك كەلىسىمگە قول قويعان. ول ارىزىندا امانتاي اسىلبەكتىڭ مورالدىق جانە ماتەريالدىق شىعىندى وتەگەنىن جانە دەنساۋلىعىنا بايلانىستى سوتقا قاتىسا المايتىنىن جازعان.
سوت زارداپ شەككەن تاراپتىڭ كەلىسىمىنە بايلانىستى ءىستى توقتاتتى.
ءوز سوزىندە امانتاي قاجى ءوزىن كىناسىز دەپ اتاپ، بولعان جاعدايدى «جالا» دەپ باعالادى. ول وقيعانىڭ تالعات مۇساباەۆتى اقتىق ساپارعا شىعارىپ سالۋ كەزىندە بولعانىن ايتىپ، ماس ايەلدىڭ ءوزىن قۇشاقتاماق بولعانىن، ال ءوزىنىڭ قولىن قاعىپ جىبەرگەندە ايەل قۇلاپ كەتكەنىن جەتكىزدى.
«مەن ادال، تازا اداممىن. مۇندا ەشقانداي قاساقانا ارەكەت بولعان جوق. جاۋلارىم كوپ، بالكىم سونىڭ كەسىرىنەن وسىنداي جاعداي تۋىنداعان شىعار»، – دەدى ول.
