QazNews24 satıralyq paraqshasynyń ákimshisi Temirlan Eńsebekke qatysty sot otyrysy ótti, dep habarlaıdy “Adyrna” ulttyq portaly Orda.kz-ke siltep.
27 aqpan kúni Almaty qalasynyń Almaly aýdandyq sotynda QazNews24 satıralyq paraqshasynyń ákimshisi Temirlan Eńsebekke qatysty alǵashqy sot otyrysy ótti. Ol sotqa onlaın rejımde qatysty.
Sot proesi bastalar aldynda kútpegen ózgerister oryn aldy – sýdıa aýysyp, isti Serik Kenishev qaraıtyn boldy. Buǵan deıingi sot otyrysy «sýdıanyń otbasylyq jaǵdaıyna» baılanysty keıinge shegerilgen edi.
Otyrysta prokýror Aınash Jýasbaeva isti Naýryzbaı aýdandyq sotyna aýystyrýdy surady. Sebebi Eńsebek dál osy aýdanda ustalǵan. Advokat Janar Balǵabaeva bul máseleniń tergeý kezinde kóterilmegenin aıtyp, Temirlannyń sotqa offlaın qatysýyn surady. Sýdıa bul ótinishti qanaǵattandyrdy.
Sondaı-aq, advokat Balǵabaeva sottyń ashyq ótýin jáne halyqaralyq baqylaýshylardyń qatysýyn talap etti. Al Eńsebek:
«Aıyptaý aktisinde meni adamzatqa qarsy qylmys jasady dep kórsetse, onda adamzat osy sotty kóretin bolsyn. Onyń ústine, sot qyzyqty ótedi», – dep málimdedi.
Advokat sot otyrysy kezinde Temirlandy bostandyqqa shyǵarýdy jáne bultartpaý sharasyn úı qamaqqa aýystyrýdy surady. Alaıda prokýror onyń qylmysyn «aýyr» dep baǵalap, ótinishti qanaǵattandyrmaýdy surady. Nátıjesinde, barlyq ótinishter qabyldanbaı, is Naýryzbaı aýdandyq sotyna aýystyryldy. Temirlan Eńsebek qamaýda qala beredi.
Eske salsaq, Temirlan Eńsebekke QR Qylmystyq kodeksiniń 174-baby («Ult aralyq arazdyqty qozdyrý») boıynsha is qozǵalǵan. Onyń Tına Kandelakı týraly jazbasy men «Ioý, orystar» ániniń jarııalanýy tergeýge negiz boldy.
