اقش قارجى مينيسترلىگى رەسەي مۇنايىن ساتۋعا قاتىستى ليتسەنزيانى ۋاقىتشا قايتا جانداندىرعانىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى اقش قارجى مينيسترلىگى حابارلادى.
جاڭا قۇجاتقا سايكەس، رەسەي فەدەراتسياسىنان شىعارىلعان شيكى مۇناي مەن مۇناي ونىمدەرىن «ساتۋ، جەتكىزۋ جانە ءتۇسىرۋ» وپەراتسيالارىنا رۇقسات بەرىلگەن. الايدا بۇل تەك 2026 جىلدىڭ 17 ساۋىرىنە دەيىن تانكەرلەرگە تيەلگەن مۇنايعا قاتىستى بولماق. ليتسەنزيانىڭ ارەكەت ەتۋ مەرزىمى 16 مامىرعا دەيىن جالعاسادى.
ايتا كەتەيىك، بۇعان دەيىن اقش ناۋرىز ايىندا دا شەكتەۋلەردى ۋاقىتشا جەڭىلدەتىپ، 12 ناۋرىزعا دەيىن تيەلگەن مۇنايدى ساتۋعا رۇقسات بەرگەن ەدى. سونىمەن قاتار، اقش قارجى ءمينيسترى سكوتت بەسسەنت ۆاشينگتوننىڭ رەسەي جانە يران مۇنايىن ساتىپ الۋعا ارنالعان ليتسەنزيالاردى ۇزارتۋدى جوسپارلامايتىنىن مالىمدەدى.
ءوز كەزەگىندە، رەسەي پرەزيدەنتىنىڭ ءباسپاسوز حاتشىسى دميتري پەسكوۆ اقش تاراپىنان مۇنداي شەشىم بولۋى مۇمكىن ەكەنىن ماسكەۋ الدىن الا بولجاعانىن ايتتى. ونىڭ سوزىنشە، رەسەي بىرنەشە جىلدان بەرى سانكتسيالار جاعدايىندا جۇمىس ىستەپ كەلەدى.
ال ابباس اراكچي يران ليۆان مەن يزرايل اراسىنداعى ۋاقىتشا ءبىتىم كەزەڭىندە ورمۇز بۇعازىن تولىق اشقانىن حابارلادى. بۇل مالىمدەمەدەن كەيىن الەمدىك مۇناي باعاسى تومەندەدى. Brent ماركالى مۇنايدىڭ ءبىر باررەلى ءبىر ايدان استام ۋاقىتتان كەيىن العاش رەت 90 دوللاردان تومەن ءتۇسىپ، 87,8 دوللار دەڭگەيىنە دەيىن ارزاندادى.
