قۇلسارى قالاسىندا كوز جۇمعان 17 جاستاعى ەلدار امانبەكتىڭ اناسى تەرگەۋدىڭ ءادىل جۇرگىزىلۋىن تالاپ ەتۋدە، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
تۇڭعىش ۇلىنان ايىرىلعان التىناي شالتاەۆا قىلمىسقا قاتىسى بارلاردىڭ بارلىعى قاماۋعا الىنسىن دەيدى. ايتۋىنشا، 12 ادام ۇلىن باسقا جىگىتپەن شاتاستىرىپ، پىشاقتاپ كەتكەن.
قايعىلى وقيعا وتكەن جىلدىڭ قاڭتارىندا بولعان. 11-سىنىپ وقۋشىسى جوعارى وقۋ ورنىنا تۇسۋگە دايىندالىپ جۇرگەن. ول دوسىنىڭ تۋعان كۇنىنە كەتكەن بوزبالا سول ءتۇنى ۇيىنە ورالمادى.
"ەلدار ازىلقوي، كوڭىلدى بالا ەدى. سول كۇنى اينانىڭ الدىندا بيلەپ، كيىمىن اۋىستىرىپ تۇرعان. بەتىمنەن ءسۇيىپ، تۋعان كۇن اياقتالعاندا قايتامىن دەدى. بىراق سول كەتكەننەن قايتىپ كەلمەدى..." – دەپ، كوزىنە جاس الدى مارقۇمنىڭ اناسى.
وقيعا بەينەباقىلاۋ كامەراسىنا ءتۇسىپ قالعان. كادرلاردا جولمەن كەتىپ بارا جاتقان كولىكتى ءبىر توپ ادامنىڭ توقتاتىپ، ىشىندەگى جىگىتتەردى سوققىعا جىققانى انىق كورىنەدى. جابىرلەنۋشىلەردىڭ ايتۋىنشا، كۇدىكتىلەر ەلداردى باسقا بىرەۋمەن شاتاستىرىپ، اياۋسىز ۇرىپ-سوعىپ، پىشاقتاعان.
"بالامنىڭ كۇرەتامىرىن كەسىپ جىبەرگەن. ول كوپ قان جوعالتىپ، سول جەردە كوز جۇمدى. كۇدىكتىلەر بولسا، ونى باسقا بىرەۋمەن شاتاستىرىپپىز دەپ اقتالۋدا. بىراق ولاردىڭ بارلىعى جاساعان ىسىنە ساي جازاعا تارتىلۋى كەرەك!" – دەيدى اناسى.
اتىراۋ وبلىستىق پوليتسيا دەپارتامەنتىنىڭ مالىمەتىنشە، بۇل وقيعا بويىنشا بىرنەشە باپپەن ءىس قوزعالعان.
"كۇدىكتىلەرگە قاتىستى "ادام ولىمىنە اكەلىپ سوققان دەنساۋلىققا قاساقانا اۋىر زيان كەلتىرۋ", "بۇزاقىلىق" باپتارىمەن قىلمىستىق ءىس قوزعالدى. سوت شەشىمىمەن 5 كۇدىكتى قاماۋعا الىنىپ، 7 كۇدىكتى ۇيقاماققا جىبەرىلدى. قازىر تەرگەۋ امالدارى ءجۇرىپ جاتىر،" – دەدى تەرگەۋ باسقارماسىنىڭ اعا تەرگەۋشىسى تەمىرحان حاجمۇراتوۆ.
مارقۇمنىڭ وتباسى ءىستىڭ ءادىل تەرگەلۋىن سۇراپ، قىلمىسقا قاتىسى بارلاردىڭ بارلىعى زاڭ الدىندا جاۋاپ بەرگەنىن قالايدى.
