20 اقپاندا قىرعىزستانداعى "سينەماتيكا" كينوتەاترلار جەلىسى قازاقستاندىق رەجيسسەر اقان ساتاەۆتىڭ "رەكەتير 3" ءفيلمىن پرەمەرا كۇنى پروكاتتان الىپ تاستاعان ەدى. كينوتەاتر وكىلدەرى بۇنداي شەشىمگە نەلىكتەن بارعاندارىن ءتۇسىندىردى، دەپ حابارلايدى "ادىرنا" ۇلتتىق پورتالى.
19 اقپاندا بىشكەكتە "رەكەتير 3" ءفيلمىنىڭ جابىق كورسەتىلىمى ءوتتى. كەلەسى كۇنى الەۋمەتتىك جەلىلەردە فيلم اكتەرلەرىمەن بىرگە رۋسلان قامشىنىڭ جۇرگەن ۆيدەوسى تارادى.
رۋسلان قامشى – قىلمىس الەمىندە تانىمال بولعان قامشى كولباەۆتىڭ ۇلى. كولباەۆ 2023 جىلدىڭ كۇزىندە قىرعىزستاننىڭ ۇلتتىق قاۋىپسىزدىك جونىندەگى مەملەكەتتىك كوميتەتىنىڭ ارنايى وپەراتسياسى كەزىندە ولتىرىلگەن.
وسىدان كەيىن، ءفيلمنىڭ پروكاتتان الىنۋى وسى وقيعاعا بايلانىستى بولۋى مۇمكىن دەگەن بولجامدار ايتىلدى.
ءفيلمنىڭ باستى ءرولىن سومداعان سايات يسەمباەۆ الەۋمەتتىك جەلىدە ۆيدەو جاريالاپ، رۋسلان قامشىنىڭ فيلمگە ەش قاتىسى جوق ەكەنىن ايتتى. ونىڭ سوزىنشە، رۋسلان جابىق كورسەتىلىمگە جاي عانا شاقىرىلعان قوناقتاردىڭ ءبىرى بولعان.
يسەمباەۆ قىرعىزستان بيلىگىن ءفيلمدى كورسەتۋگە رۇقسات بەرۋگە شاقىرىپ، قىرعىز حالقىنىڭ بۇل ءفيلمدى كۇتۋمەن بولعانىن مالىمدەدى.
قىرعىزستاننىڭ مەملەكەتتىك كينوورتالىعى "قىرعىزتاسپاسى" ءفيلمنىڭ پروكاتتان الىنۋىنا رۋسلان قامشىنىڭ ەش قاتىسى جوق ەكەنىن مالىمدەدى.
ورتالىقتىڭ باسشىسى تالانت تولوبەكوۆ بۇل شەشىمنىڭ سەبەبىن "فيلمدە جاسوسپىرىمدەرگە تەرىس اسەر ەتۋى مۇمكىن كادرلاردىڭ بولۋىمەن" بايلانىستىردى.
"جاسوسپىرىمدەر اراسىندا قايعىلى جاعدايلار بولىپ جاتىر. بۇل فيلمدە سونداي كورىنىستەر بار. سوندىقتان "قىرعىزتاسپاسى" جانىنداعى كوميسسيا فيلمگە بەرىلگەن پروكات كۋالىگىن قايتارىپ الۋ تۋرالى شەشىم قابىلدادى", – دەدى تولوبەكوۆ.
ونىڭ ايتۋىنشا، سوڭعى ەكى جىلدا قازاقستاندا تۇسىرىلگەن ەكى ءفيلمنىڭ قىرعىزستانداعى كينوتەاترلاردا كورسەتىلۋىنە تىيىم سالىنعان.
بىراق بۇل شەكتەۋلەردىڭ تەلەديدار مەن ونلاين پلاتفورمالارعا قاتىسى جوق.
