20 aqpanda Qyrǵyzstandaǵy "Sınematıka" kınoteatrlar jelisi qazaqstandyq rejısser Aqan Sataevtyń "Reketır 3" fılmin premera kúni prokattan alyp tastaǵan edi. Kınoteatr ókilderi bundaı sheshimge nelikten barǵandaryn túsindirdi, dep habarlaıdy "Adyrna" ulttyq portaly.
19 aqpanda Bishkekte "Reketır 3" fılminiń jabyq kórsetilimi ótti. Kelesi kúni áleýmettik jelilerde fılm akterlerimen birge Rýslan Qamshynyń júrgen vıdeosy tarady.
Rýslan Qamshy – qylmys áleminde tanymal bolǵan Qamshy Kólbaevtyń uly. Kólbaev 2023 jyldyń kúzinde Qyrǵyzstannyń ulttyq qaýipsizdik jónindegi memlekettik komıtetiniń arnaıy operaııasy kezinde óltirilgen.
Osydan keıin, fılmniń prokattan alynýy osy oqıǵaǵa baılanysty bolýy múmkin degen boljamdar aıtyldy.
Fılmniń basty rólin somdaǵan Saıat Isembaev áleýmettik jelide vıdeo jarııalap, Rýslan Qamshynyń fılmge esh qatysy joq ekenin aıtty. Onyń sózinshe, Rýslan jabyq kórsetilimge jaı ǵana shaqyrylǵan qonaqtardyń biri bolǵan.
Isembaev Qyrǵyzstan bıligin fılmdi kórsetýge ruqsat berýge shaqyryp, qyrǵyz halqynyń bul fılmdi kútýmen bolǵanyn málimdedi.
Qyrǵyzstannyń memlekettik kınoortalyǵy "Qyrǵyztaspasy" fılmniń prokattan alynýyna Rýslan Qamshynyń esh qatysy joq ekenin málimdedi.
Ortalyqtyń basshysy Talant Tolobekov bul sheshimniń sebebin "fılmde jasóspirimderge teris áser etýi múmkin kadrlardyń bolýymen" baılanystyrdy.
"Jasóspirimder arasynda qaıǵyly jaǵdaılar bolyp jatyr. Bul fılmde sondaı kórinister bar. Sondyqtan "Qyrǵyztaspasy" janyndaǵy komıssııa fılmge berilgen prokat kýáligin qaıtaryp alý týraly sheshim qabyldady", – dedi Tolobekov.
Onyń aıtýynsha, sońǵy eki jylda Qazaqstanda túsirilgen eki fılmniń Qyrǵyzstandaǵy kınoteatrlarda kórsetilýine tyıym salynǵan.
Biraq bul shekteýlerdiń teledıdar men onlaın platformalarǵa qatysy joq.
