Respublica پارتياسى مانداتىن تاپسىرعان رۋسلان بەردەنوۆتىڭ ورنىنا ەكاتەرينا سمولياكوۆانى ءماجىلىس دەپۋتاتى ەتتى، دەپ حابارلايدى "ادىرنا" ۇلتتىق پورتالى.
ءماجىلىس وتىرسىنان كەيىن جۋرناليستەر سۋ جاڭا دەپۋتات ەكاتەرينا سمولياكوۆاعا بىرنەشە سۇراق قويدى. ارىپتەستەردىڭ ءبىرى «ءسىزدىڭ مەملەكەتتىك ءتىلدى بىلەتىنىڭىز وتە ماڭىزدى. بىراق ەلىمىزدەگى قازاق ءتىلىن بىلمەيتىن ازاماتتارعا كوزقاراسىڭىز قالاي؟ ءوز ەلىندە تۇرىپ ءوزىنىڭ ءتىلىن بىلمەگەن، ايىپ، ۇيات ەمەس پە؟» دەدى دەپۋتاتقا.
ەكاتەرينا سەرگەيقىزىنىڭ ايتۋىنشا، مەملەكەتتىك ءتىلدى ءبىلۋ ءار قازاقستان ازاماتىنىڭ پارىزى، مىندەتى. ايتسە دە ول ەشكىمگە ايىپ تاعىپ، كىنالاماي المايتىنىن ەسكەرتتى.
«جالپى ءوزىم رەسەيدە تۋىپ، وسكەنمىن. وتباسىلىق جاعدايعا بايلانىستى 2000 جىلدارى قازاقستانعا كوشىپ، كەلىپ، وسىندا ورىس تىلىندە ءبىلىم الدىم. ودان كەيىن بەلگىلى ءبىر جاعدايلارعا وراي قازاق ءتىلى مەن ادەبيەتى ماماندىعىنا وقۋعا ءتۇستىم. كاسىبي قىزمەتىم قازاق ءتىلى مەن ادەبيەتى ءپانىنىڭ مۇعالىمدىگى قىزمەتىنەن باستالدى»، – دەدى ول.
– بىزدە مەملەكەتتىك ءتىلدى مەڭگەرگەن ازاماتتار دەپۋتات بولىپ سايلانادى. ولاردىڭ ىشىندە كەرەمەت مامان دەپ ايتۋعا بولمايتىن ادامدار كەزدەسىپ قالادى. سىزدە سولاي كەزدەيسوق دەپۋتات بولعان جوقسىز با؟
– ەندى مەن بىرەۋدى «كەزدەسەيسوق جاعدايدا لاۋازىمعا جەتتى» دەپ ايتا المايمىن. مەنىڭ بۇل جەرگە كەلۋىمدى پارتيامىزدىڭ ورتالىق كەڭەسى شەشتى. مەن پارتيانىڭ قۇرامىندا ءبىرىنشى كۇننەن باستاپ بارمىن جانە پارتيالىق تىزىمدە دە بارمىن. ورتالىق كەڭەستىڭ شەشىمىمەن روتاتسيا بويىنشا وسىندا كەلىپ وتىرمىن. ال قانداي جۇمىس ناتيجەسىن كورسەتەمىن، ونى الداعى ۋاقىتتا ەلەكتورات، سايلاۋشىلار وزدەرى باعالاپ، وزدەرى ايتادى دەپ سانايمىن.
– ءوزىڭىز قازاق ءتىلى مەن ادەبيەتىنىڭ مامانى ەكەندىگىڭىزدى ايتتىڭىز. ماجىلىستە زاڭ سالاسىنىڭ ماماندارى وتىرۋ كەرەك. ءسىز زاڭ جوباسىن وقىپ، ونى تۇسىنە الاسىز با؟
– ارينە، تۇسىنەمىز. مۇعالىمدىكتەن بولەك، مەنىڭ ۋنيۆەرسيتەتتىڭ اكىمشىلىگىندە ىستەگەن 10 جىلدىق تاجىريبەم بار. سوندىقتان مەن پەداگوگتىق جانە ۋنيۆەرسيتەت قابىرعاسىنداعى باسشىلىق تاجىريبەمدى ەكسپەرت رەتىندە وسىندا جۇمسايتىن بولامىن.
