Almaty TV-دە «الماتى كوشەلەرى» باعدارلاماسىنىڭ جاڭا شىعارىلىمى جارىق كوردى
ءار شىعارىلىمدا اۆتورلار تۇرعىندارمەن، تاريحشىلارمەن جانە ساۋلەتشىلەرمەن بىرگە وسى ۋاقىتقا دەيىن بەلگىسىز بولىپ كەلگەن دەرەكتى اشادى. سونىمەن قاتار، قالا بيلىگىنىڭ وكىلدەرىمەن بىرلەسىپ، قوعامدىق كەڭىستىكتەردى، كوشەلەر مەن داڭعىلداردى جاڭارتۋ جانە وزگەرتۋ جوسپارلارى تۋرالى ايتىپ بەرەدى.
«الماتى كوشەلەرى» – مەگاپوليسپەن بىرگە ءومىر سۇرەتىن، وسەتىن جانە داميتىن تۇتاس ءبىر تاريح پەن الەم. جۋرناليستەر باعدارلامانىڭ جاڭا شىعارىلىمىن قانىش ساتباەۆ كوشەسىنە ارنادى.
قانىش ساتباەۆ اتىنداعى كوشە – الماتىنىڭ باستى كولىك ارتەريالارىنىڭ ءبىرى، ول قالانىڭ جانە ونىڭ وڭتۇستىك-باتىس اۋداندارىنىڭ دامۋ تاريحىن بويىندا ساقتاپ كەلەدى. بۇل كوشە 1960-جىلدارى قالىپتاسىپ، قالانىڭ بەلسەندى كەڭەيۋىنىڭ جانە بۇرىنعى كولحوز جەرلەرىنىڭ يگەرىلۋىنىڭ كۋاسى بولدى.
[embed]
[/embed]كوشەنىڭ قازاقستان تاۋەلسىزدىگىنىڭ تاريحىمەن بايلانىسى داۋسىز. تاۋەلسىزدىك العاننان كەيىن ەل قارقىندى دامي باستادى جانە مەملەكەتتىڭ بەدەلىن كوتەرەتىن، ەگەمەندىكتى بەينەلەيتىن ەسكەرتكىشتىڭ قاجەتتىلىگى تۋىندادى. 1996 جىلى قانىش ساتباەۆ كوشەسىنە جاقىن ورنالاسقان رەسپۋبليكا الاڭىندا تاۋەلسىزدىك مونۋمەنتى تۇرعىزىلىپ، ول ەلدىڭ ازاتتىعى مەن وركەندەۋىنىڭ سيمۆولىنا اينالدى.
جىل سايىن 16 جەلتوقساندا تاۋەلسىزدىك مونۋمەنتىنە گۇل شوعىن قويۋ ءراسىمى وتەدى – بۇل ەلدىڭ بوستاندىعى ءۇشىن كۇرەسكەن جانداردىڭ قۇرمەتىنە كورسەتىلگەن تاعزىم.
قانىش ساتباەۆ كوشەسىنىڭ اتاۋى كورنەكتى عالىم، اكادەميك جانە قوعام قايراتكەرىنىڭ ەسىمىمەن بەكەر اتالعان جوق. ول قازاقستان عىلىمىنىڭ دامۋىنا زور ۇلەس قوستى. ونىڭ مىس جانە مارگانەتس كەن ورىندارىن اشۋى ەلدى بۇگىنگى كۇنگە دەيىن ءوندىرىلىپ كەلە جاتقان باعالى رەسۋرستارمەن قامتاماسىز ەتتى. قانىش ساتباەۆتىڭ مۇراسىن ءوزى اتىنداعى كوشەدە ورنالاسقان ۋنيۆەرسيتەتتىڭ ستۋدەنتتەرى ەرەكشە قۇرمەتپەن ەسكە الادى.
قازىرگى ۋاقىتتا الماتى اكىمى ەربولات دوساەۆتىڭ تاپسىرماسىمەن احمەت بايتۇرسىنۇلى مەن قانىش ساتباەۆ كوشەلەرىنىڭ قيىلىسىندا ورنالاسقان گەولوگتار اللەياسىن كۇردەلى جوندەۋدەن وتكىزۋگە ارنالعان جوبالىق-سمەتالىق قۇجاتتاما ازىرلەنۋدە. مۇندا جارىقتاندىرۋ، ورىندىقتار مەن جولدار ورناتۋ، سونداي-اق اباتتاندىرۋ جۇمىستارى جۇرگىزىلىپ، بۇل ورىن تۇرعىندار ءۇشىن جايلى دەمالىس ايماعىنا اينالماق. جۇمىستار جىل سوڭىنا دەيىن اياقتالادى دەپ جوسپارلانۋدا.
ايتا كەتەيىك، بيىلعى جىلى تەك ساتباەۆ كوشەسى عانا ەمەس، باسقا دا كوشەلەر كوركەيتىلەدى. قالا باسشىسىنىڭ تاپسىرماسىنا سايكەس، دوستىق داڭعىلى مەن پۋشكين كوشەسىندە «قاسبەتتەردەن قاسبەتكە دەيىن» جوباسى جۇزەگە اسىرىلادى. بۇل جوبا جولداردى جاڭارتۋ، تروتۋارلاردى اباتتاندىرۋ، عيمارات قاسبەتتەرىن جاڭارتۋ جانە كوگالداندىرۋ جۇمىستارىن قامتيدى.
المالى اۋدانى تۇرعىندارىمەن كەزدەسۋدە الماتى اكىمى ەربولات دوساەۆ وسى ادىسپەن 2025 جىلى جىبەك جولى داڭعىلىنىڭ (نازارباەۆ داڭعىلىنان سەيفۋللين داڭعىلىنا دەيىن) جاياۋ جۇرگىنشىلەر ايماعىن جوندەۋ جانە مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى جانىنداعى سكۆەردى جاڭارتۋ جوسپارلانىپ وتىرعانىن ايتتى.
جالپى، 2025-2026 جىلدارى قالادا 49,2 شاقىرىمدى قۇرايتىن 11 كوشەدە كەشەندى اباتتاندىرۋ جۇمىستارى جۇرگىزىلمەك. الماتى – ەلىمىزدەگى جايلى قالالىق ورتا قۇرۋ بويىنشا حالىقارالىق ستاندارتتاردى ەنگىزىپ وتىرعان العاشقى قالا.
