قازاقستاندا ۇلتتىق قوردان بولىنگەن قاراجاتتىڭ جۇمسالۋىنا مونيتورينگ جۇرگىزۋ جونىندەگى كوميسسيا جۇمىسىن قايتا باستادى. بۇل تۋرالى بۇگىن، 24 اقپاندا جوعارى اۋديتورلىق پالاتانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
ۇزاق ۇزىلىستەن كەيىن بيىل 21 اقپاندا ءاليحان سمايىلوۆتىڭ توراعالىعىمەن جوعارى اۋديتورلىق پالاتادا كوميسسيانىڭ وتىرىسى ءوتتى. جيىندا ۇلتتىق قور قاراجاتىن جۇمساۋدىڭ زاڭدىلىعى مەن تيىمدىلىگىنە مونيتورينگ جۇرگىزۋ تاسىلدەرى وزەكتەندىرىلەتىنى ءسوز بولدى.
«كوميسسيانىڭ جۇمىسىن قايتا باستاۋىمىز كەرەك. ۆەدومستۆوارالىق ءىس-قيمىل مەن ۇلتتىق قور قاراجاتىنىڭ ءتيىمدى جانە ماقساتتى پايدالانىلۋىن باقىلاۋ ءۇشىن جاۋاپكەرشىلىك ايماقتارىن ناقتى ايقىنداۋ قاجەت»، — دەدى ءاليحان سمايىلوۆ.
«ۇلتتىق قور – بالالارعا» باعدارلاماسىنا بايلانىستى دا جۇرتشىلىقتىڭ ۇلتتىق قوردى ۇتىمدى پايدالانۋعا نازارى كۇشەيۋدە.
«ۇلتتىق قوردان الىناتىن ترانسفەرتتەردەن ەكونوميكالىق قايتارىم بولۋى قاجەت. ۇلتتىق قور مەملەكەتتىك ماڭىزدى ەمەس مىندەتتەرگە پايدالانىلماۋى ءتيىس. مەملەكەت باسشىسى وسىنداي مىندەت قويدى»، — دەپ اتاپ ءوتتى جوعارى اۋديتورلىق پالاتا توراعاسى.
ءاليحان سمايىلوۆ الداعى كەزەڭگە ارنالعان مىندەتتەردى اتاپ ءوتتى:
ۇلتتىق قوردان ەكونوميكانى جەڭىلدەتىلگەن شارتتارمەن قولداۋعا بولىنگەن قاراجاتقا تەكسەرۋ جۇرگىزۋ;
ۇلتتىق قور قاراجاتىن نەعۇرلىم باسىم باعىتتارعا قايتا ءبولۋ نەمەسە ولاردى قايتارۋ جونىندە ۇسىنىستار بەرۋ.
وتىرىس بارىسىندا كوميسسيا قۇرامىن جاڭارتۋ، ونىڭ قىزمەتىن جاڭا فورماتتا رەگلامەنتتەۋ، قورىتىندىلاردىڭ ساپاسىن ارتتىرۋ جانە تاعى دا باسقا ماسەلەلەر تالقىلاندى.
