Qazaqstanda Ūlttyq qordan bölıngen qarajattyŋ jūmsaluyna monitoring jürgızu jönındegı komissiia jūmysyn qaita bastady. Būl turaly bügın, 24 aqpanda Joǧary auditorlyq palatanyŋ baspasöz qyzmetı aitty, dep habarlaidy «Adyrna» tılşısı.
Ūzaq üzılısten keiın biyl 21 aqpanda Älihan Smaiylovtyŋ töraǧalyǧymen Joǧary auditorlyq palatada Komissiianyŋ otyrysy öttı. Jiynda Ūlttyq qor qarajatyn jūmsaudyŋ zaŋdylyǧy men tiımdılıgıne monitoring jürgızu täsılderı özektendırıletını söz boldy.
«Komissiianyŋ jūmysyn qaita bastauymyz kerek. Vedomstvoaralyq ıs-qimyl men Ūlttyq qor qarajatynyŋ tiımdı jäne maqsatty paidalanyluyn baqylau üşın jauapkerşılık aimaqtaryn naqty aiqyndau qajet», — dedı Älihan Smaiylov.
«Ūlttyq qor – balalarǧa» baǧdarlamasyna bailanysty da jūrtşylyqtyŋ Ūlttyq qordy ūtymdy paidalanuǧa nazary küşeiude.
«Ūlttyq qordan alynatyn transfertterden ekonomikalyq qaitarym boluy qajet. Ūlttyq qor memlekettık maŋyzdy emes mındetterge paidalanylmauy tiıs. Memleket basşysy osyndai mındet qoidy», — dep atap öttı Joǧary auditorlyq palata töraǧasy.
Älihan Smaiylov aldaǧy kezeŋge arnalǧan mındetterdı atap öttı:
Ūlttyq qordan ekonomikany jeŋıldetılgen şarttarmen qoldauǧa bölıngen qarajatqa tekseru jürgızu;
Ūlttyq qor qarajatyn neǧūrlym basym baǧyttarǧa qaita bölu nemese olardy qaitaru jönınde ūsynystar beru.
Otyrys barysynda komissiia qūramyn jaŋartu, onyŋ qyzmetın jaŋa formatta reglamentteu, qorytyndylardyŋ sapasyn arttyru jäne taǧy da basqa mäseleler talqylandy.
