بۇگىن الماتىدا كورنەكتى جازۋشى، بەلگىلى دراماتۋرگ، قازاقستاننىڭ ەڭبەك ەرى، مەملەكەتتىك سىيلىقتىڭ لاۋرەاتى دۋلات يسابەكوۆتى اقتىق ساپارعا شىعارىپ سالۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
قازاق ادەبيەتىنىڭ الىپ تۇلعاسىمەن قوشتاسۋ جازۋشىلار وداعىنىڭ عيماراتىندا ءوتتى. قارالى جيىنعا مەملەكەت جانە قوعام قايراتكەرلەرى، جازۋشىلار، ونەر مەن مادەنيەت سالاسىنىڭ وكىلدەرى جانە قاراپايىم حالىق جينالدى. جيىندى قازاقستان جازۋشىلار وداعىنىڭ توراعاسى مەرەكە قۇلكەنوۆ جۇرگىزدى.
قر مەملەكەتتىك كەڭەسشىسى ەرلان قارين مەملەكەت باسشىسى قاسىم-جومارت توقاەۆتىڭ كوڭىل ايتۋ حاتىن وقىپ بەردى. پرەزيدەنت جازۋشىنىڭ ۇلت رۋحانياتىنا قوسقان زور ۇلەسىن اتاپ ءوتىپ، دۋلات يسابەكوۆتىڭ ەسىمى قازاق حالقىنىڭ جۇرەگىندە ماڭگى ساقتالاتىنىن جەتكىزدى.
جيىن بارىسىندا جازۋشىنىڭ زامانداستارى مەن قالامگەر دوستارى تەبىرەنە ەستەلىكتەر ايتتى. جازۋشى تولەن ابدىكوۆ دۋلات يسابەكوۆتىڭ ورنى تولماس تۇلعا ەكەنىن، ونىڭ شىعارماشىلىعى كۇلدىرە دە، جىلاتا دا بىلگەن عاجايىپ ونەر يەسىنىڭ قولتاڭباسى ەكەنىن اتاپ ءوتتى. بەكسۇلتان نۇرجەكە مەن مەرەكە قۇلكەنوۆ تە قازاق ادەبيەتىنىڭ ورنى تولماس قايعىعا دۋشار بولعانىن ايتتى.
مارقۇمنىڭ جاقىندارىنا پرەمەر-مينيستر ولجاس بەكتەنوۆ، سەنات توراعاسى ماۋلەن اشىمباەۆ، ءماجىلىس توراعاسى ەرلان قوشانوۆ جانە وبلىس اكىمدەرىنىڭ كوڭىل ايتۋ حاتتارى تابىستالدى.
ەسكە سالا كەتەيىك، 21 اقپان كۇنى قازاق ادەبيەتىنىڭ كورنەكتى وكىلى، جازۋشى-دراماتۋرگ دۋلات يسابەكوۆ 83 جاسىندا دۇنيەدەن ءوتتى.
