Búgin Almatyda kórnekti jazýshy, belgili dramatýrg, Qazaqstannyń Eńbek Eri, Memlekettik syılyqtyń laýreaty Dýlat Isabekovti aqtyq saparǵa shyǵaryp salý rásimi ótti, dep habarlaıdy "Adyrna" ulttyq portaly.
Qazaq ádebıetiniń alyp tulǵasymen qoshtasý Jazýshylar odaǵynyń ǵımaratynda ótti. Qaraly jıynǵa memleket jáne qoǵam qaıratkerleri, jazýshylar, óner men mádenıet salasynyń ókilderi jáne qarapaıym halyq jınaldy. Jıyndy Qazaqstan Jazýshylar odaǵynyń tóraǵasy Mereke Qulkenov júrgizdi.
QR Memlekettik keńesshisi Erlan Qarın Memleket basshysy Qasym-Jomart Toqaevtyń kóńil aıtý hatyn oqyp berdi. Prezıdent jazýshynyń ult rýhanııatyna qosqan zor úlesin atap ótip, Dýlat Isabekovtiń esimi qazaq halqynyń júreginde máńgi saqtalatynyn jetkizdi.
Jıyn barysynda jazýshynyń zamandastary men qalamger dostary tebirene estelikter aıtty. Jazýshy Tólen Ábdikov Dýlat Isabekovtiń orny tolmas tulǵa ekenin, onyń shyǵarmashylyǵy kúldire de, jylata da bilgen ǵajaıyp óner ıesiniń qoltańbasy ekenin atap ótti. Beksultan Nurjeke men Mereke Qulkenov te qazaq ádebıetiniń orny tolmas qaıǵyǵa dýshar bolǵanyn aıtty.
Marqumnyń jaqyndaryna Premer-mınıstr Oljas Bektenov, Senat Tóraǵasy Máýlen Áshimbaev, Májilis Tóraǵasy Erlan Qoshanov jáne oblys ákimderiniń kóńil aıtý hattary tabystaldy.
Eske sala keteıik, 21 aqpan kúni Qazaq ádebıetiniń kórnekti ókili, jazýshy-dramatýrg Dýlat Isabekov 83 jasynda dúnıeden ótti.
