اقجۇرەك تاڭاتاروۆ: الەم چەمپيوناتى وتە جوعارى دەڭگەيدە ۇيىمداستىرىلعان!

568

لوندون وليمپياداسىنىڭ ەركىن كۇرەستەن قولا جۇلدەگەرى اقجۇرەك تاڭاتاروۆ كەشە عانا ەلورداسى – نۇر-سۇلتان قالاسىندا وتكەن كۇرەس تۇرلەرىنەن الەم چەمپيوناتىنىڭ ۇيىمداستىرىلۋىن جوعارى دەپ باعالادى.

«بۇعان دەيىن ەكى الەم چەمپيوناتىنىڭ ۇيىمداستىرىلۋ دەڭگەيىن جوعارى باعالايتىنمىن. ءبىرى لاس-ۆەگاستا وتكەن ليتسەنزيالىق تۋرنير بولسا، ەكىنشىسى پاريجدە وتكەن الەم چەمپيوناتى، مىنە، ولاردىڭ قاتارىندا ەلىمىزدە ۇيىمداستىرىلعان الەم چەمپيوناتى قوسىلىپ وتىر. ءبىزدىڭ ولاردان ءبىر ارتىقشىلىعىمىز – زالدىڭ كورەرمەندەرمەن لىق تولۋى. كۇرەستى كورۋگە ەلىمىزدىڭ تۇكپىر-تۇكپىرىنەن سپورتسۇيەر قاۋىم كەلدى. وسىنىڭ ءوزى ەلىمىزدىڭ كۇرەس ونەرىنىڭ جوعارى دەڭگەيىن ايقىندايدى. الەم چەمپيوناتىنا كىل مىقتى كەلدى، سايدىڭ تاسىنداي ىرىكتەلىنىپ الىنعان سپورتشىلار ەلوردا تورىندە وليمپيادا جولداماسىنا تالاستى. باسەكە وتە جوعارى بولدى. مەن ۇيىمداستىرۋ دەڭگەيىن وتە جوعارى دەپ باعالايمىن»،-دەدى وليمپيادا جۇلدەگەرى.

ايتا كەتەيىك، 2019 جىلدىڭ 14-22 قىركۇيەك ارالىعىندا قازاقستاننىڭ استاناسى سپورت الەمىندەگى اۋقىمدى ءىس-شارا، ياعني گرەك-ريم، ەركىن جانە ايەلدەر كۇرەسىنەن الەم چەمپيوناتىن قابىلدادى. ءبىر ايتا كەتەرلىگى، نۇر-سۇلتانداعى الەم بىرىنشىلىگى 2020 جىلعى توكيو وليمپياداسىنىڭ ليتسەنزياسى ۇلەستىرىلگەن العاشقى ىرىكتەۋ ءتۋرنيرى بولدى. ەل قورجىنىندا 3 كۇمىس، 4 قولا، 8 وليمپيادا جولداماسى بار.

پىكىرلەر