Aqjúrek Tańatarov: Álem Chempıonaty óte joǵary deńgeıde uıymdastyrylǵan!

479

London Olımpıadasynyń erkin kúresten qola júldegeri Aqjúrek Tańatarov keshe ǵana elordasy – Nur-Sultan qalasynda ótken kúres túrlerinen Álem Chempıonatynyń uıymdastyrylýyn joǵary dep baǵalady.

«Buǵan deıin eki Álem Chempıonatynyń uıymdastyrylý deńgeıin joǵary baǵalaıtynmyn. Biri Las-Vegasta ótken lıenzııalyq týrnır bolsa, ekinshisi Parıjde ótken álem chempıonaty, mine, olardyń qatarynda elimizde uıymdastyrylǵan Álem Chempıonaty qosylyp otyr. Bizdiń olardan bir artyqshylyǵymyz – zaldyń kórermendermen lyq tolýy. Kúresti kórýge elimizdiń túkpir-túkpirinen sportsúıer qaýym keldi. Osynyń ózi elimizdiń kúres óneriniń joǵary deńgeıin aıqyndaıdy. Álem Chempıonatyna kil myqty keldi, saıdyń tasyndaı iriktelinip alynǵan sportshylar elorda tórinde Olımpıada joldamasyna talasty. Báseke óte joǵary boldy. Men uıymdastyrý deńgeıin óte joǵary dep baǵalaımyn»,-dedi olımpıada júldegeri.

Aıta keteıik, 2019 jyldyń 14-22 qyrkúıek aralyǵynda Qazaqstannyń astanasy sport álemindegi aýqymdy is-shara, ıaǵnı grek-rım, erkin jáne áıelder kúresinen álem chempıonatyn qabyldady. Bir aıta keterligi, Nur-Sultandaǵy álem birinshiligi 2020 jylǵy Tokıo Olımpıadasynyń lıenzııasy úlestirilgen alǵashqy irikteý týrnıri boldy. El qorjynynda 3 kúmis, 4 qola, 8 olımpıada joldamasy bar.

Pikirler