سەنات توراعاسى ماۋلەن اشىمباەۆ الەمدىك جانە ءداستۇرلى دىندەر كوشباسشىلارى سەزىنىڭ ىزگى نيەت ەلشىسى ديماش قۇدايبەرگەنمەن كەزدەستى، دەپ حابارلايدى “ادىرنا” ۇلتتىق پورتالى.
بۇل تۋرالى سەناتتىڭ ءباسپاسوز قىزمەتى حابارلادى.
كەزدەسۋ بارىسىندا ماۋلەن اشىمباەۆ ديماش قۇدايبەرگەننىڭ قازاقتىڭ ۇلتتىق مادەنيەتىن دارىپتەۋگە قوسقان ۇلەسىن ەرەكشە اتاپ ءوتتى. ونىڭ ونەرى ارقىلى بەيبىتشىلىك پەن ىزگىلىك يدەيالارىن ناسيحاتتاپ، حالىقتار مەن مادەنيەتتەر اراسىنداعى ديالوگتى نىعايتۋعا ىقپال ەتىپ كەلە جاتقانىن ايتتى.
“پرەزيدەنتىمىز قاسىم-جومارت توقاەۆ دىنارالىق جانە وركەنيەتارالىق ديالوگ ماسەلەلەرىنە ۇنەمى باسا ءمان بەرىپ كەلەدى. قازىرگى جاھاندىق سىن-قاتەرلەر جاعدايىندا رۋحاني ديپلوماتيانىڭ ماڭىزى ارتا ءتۇستى. بەيبىتشىلىك پەن ديالوگ مادەنيەتىن دارىپتەۋ اسا ماڭىزدى. وسى تۇرعىدا ءدىني، ساياسي جانە قوعامدىق كوشباسشىلاردىڭ بىرلەسكەن كۇش-جىگەرى ۇلكەن ءرول اتقارادى. ءسىز الداعى ۋاقىتتا دا ءوزىڭىزدىڭ شىعارماشىلىعىڭىزبەن جانە كرەاتيۆتى جوبالارىڭىزبەن بەيبىتشىلىك پەن كەلىسىم يدەيالارىن حالىقارالىق دەڭگەيدە ىلگەرىلەتۋگە زور ۇلەسىڭىزدى قوسا بەرەسىز دەپ سەنەمىن”، – دەدى ماۋلەن اشىمباەۆ.
وسى كەزدەسۋدە سەنات توراعاسى ديماش قۇدايبەرگەنگە سەزدىڭ ىزگى نيەت ەلشىسى توسبەلگىسىن تابىس ەتتى.
كەزدەسۋدە الەمدىك جانە ءداستۇرلى دىندەر كوشباسشىلارىنىڭ VIII سەزىنە جانە جاس ءدىني ليدەرلەردىڭ II فورۋمىنا دايىندىق بارىسى تالقىلاندى. سونىمەن قاتار، سەزد تۇجىرىمداماسىن ىسكە اسىرۋ جانە وسى باعىتتاعى بىرلەسكەن جوبالار جايىندا پىكىر الماستى.
ايتا كەتەيىك، ديماشتىڭ سەنات عيماراتىندا جۇرگەنى حابارلانعان بولاتىن.
