“زيانىن تيگىزە باستادى»: ديماش قۇدايبەرگەن قازاق حالقىنا ۇندەۋ جاسادى

4295
Adyrna.kz Telegram

تانىمال ءانشى ديماش قۇدايبەرگەن قازاقستاندىقتاردى ينتەرنەت الاياقتاردان ساق بولۋعا شاقىرىپ، ۇندەۋ جولدادى. بۇل تۋرالى ول Instagram پاراقشاسىندا جازدى، دەپ حابارلايدى “ادىرنا” ۇلتتىق پورتالى.

ءانشىنىڭ ايتۋىنشا، الاياقتار ءانشىنىڭ اتىن جامىلىپ، الەۋمەتتىك جەلىنى ءوز ماقساتتارىنا قولدانىپ ءجۇر.

«اسسالاۋماعالەيكۋم، قۇرمەتتى دوستار! بۇل بەينەتاسپانى جازۋداعى ماقساتىم – ينتەرنەت جەلىسىندە، Facebook-تە مەنىڭ اتىمنان اشىلعان ءتۇرلى پاراقشالار حالىققا جانە ماعان زيانىن تيگىزە باستادى. جالپى مەن ەشقاشاندا اقشا سۇرايتىن ويىندار وتكىزبەن ەمەسپىن. تىڭدارماندارىم بىلە جاتار، قاتەلەسپەسەم تىكەلەي ەفيردىڭ وزىنە 3-4 رەت قانا شىققام. الداعى شىعارماشىلىق جاڭالىقتارمەن ءبولىسۋ ءۇشىن. سونى سكرينشوتقا ءتۇسىرىپ الىپ، وزدەرىنىڭ الاياقتىق ارەكەتتەرىن جۇزەگە اسىرۋ ماقساتىندا ديماش قۇدايبەرگەن بولىپ Facebook-تە جالعان پاراقشالار اشىپ الىپ، حالىقپەن تىلدەسىپ وتىرعان فوتومدى قويىپ قويعان. سول ارقىلى لوتەرەيا سياقتى ءتۇرلى ويىندار وتكىزىپ جاتقان سياقتى ەتىپ كورسەتكىسى كەلىپ جاتىر»، – دەپ جازدى ديماش قۇدايبەرگەن Instagram پاراقشاسىندا.

سونداي-اق، ول بارشا حالىقتى جالعان اقپاراتقا سەنبەۋگە شاقىردى.

«وندايعا ەشقاشان سەنبەڭىزدەر، مەن ويىندار ۇيىمداستىرعان ەمەسپىن. ونىڭ ماعان قاجەتى دە جوق، سول سەبەپتەن الدانىپ قالماڭىزدار. ەسكەرتۋ، ايتۋ ماقساتىندا وسى ۆيدەونى ءتۇسىرىپ جاتىرمىن. ەشقاشاندا ينتەرنەت ارقىلى ەشكىمگە اقشا جىبەرمەڭىزدەر»، - دەيدى ول.

پىكىرلەر