Senat Tóraǵasy Máýlen Áshimbaev Álemdik jáne dástúrli dinder kóshbasshylary seziniń Izgi nıet elshisi Dımash Qudaıbergenmen kezdesti, dep habarlaıdy “Adyrna” ulttyq portaly.
Bul týraly Senattyń baspasóz qyzmeti habarlady.
Kezdesý barysynda Máýlen Áshimbaev Dımash Qudaıbergenniń qazaqtyń ulttyq mádenıetin dáripteýge qosqan úlesin erekshe atap ótti. Onyń óneri arqyly beıbitshilik pen izgilik ıdeıalaryn nasıhattap, halyqtar men mádenıetter arasyndaǵy dıalogty nyǵaıtýǵa yqpal etip kele jatqanyn aıtty.
“Prezıdentimiz Qasym-Jomart Toqaev dinaralyq jáne órkenıetaralyq dıalog máselelerine únemi basa mán berip keledi. Qazirgi jahandyq syn-qaterler jaǵdaıynda rýhanı dıplomatııanyń mańyzy arta tústi. Beıbitshilik pen dıalog mádenıetin dáripteý asa mańyzdy. Osy turǵyda dinı, saıası jáne qoǵamdyq kóshbasshylardyń birlesken kúsh-jigeri úlken ról atqarady. Siz aldaǵy ýaqytta da ózińizdiń shyǵarmashylyǵyńyzben jáne kreatıvti jobalaryńyzben beıbitshilik pen kelisim ıdeıalaryn halyqaralyq deńgeıde ilgeriletýge zor úlesińizdi qosa beresiz dep senemin”, – dedi Máýlen Áshimbaev.
Osy kezdesýde Senat Tóraǵasy Dımash Qudaıbergenge Sezdiń Izgi nıet elshisi tósbelgisin tabys etti.
Kezdesýde Álemdik jáne dástúrli dinder kóshbasshylarynyń VIII sezine jáne Jas dinı lıderlerdiń II forýmyna daıyndyq barysy talqylandy. Sonymen qatar, Sezd tujyrymdamasyn iske asyrý jáne osy baǵyttaǵy birlesken jobalar jaıynda pikir almasty.
Aıta keteıik, Dımashtyń Senat ǵımaratynda júrgeni habarlanǵan bolatyn.
