بەلگىلى جازۋشى دۋلات يسابەكوۆ 83 جاسىندا دۇنيەدەن ءوتتى. مەملەكەت باسشىسى مارقۇمنىڭ تۋىستارىنا كوڭىل ايتۋ جەدەلحاتىن جولدادى، دەپ حابارلايدى “ادىرنا” ۇلتتىق پورتالى.
قارالى حاباردى قازاقستان جازۋشىلار وداعى توراعاسىنىڭ ورىنباسارى قاسىمحان بەگمانوۆ كەشە، 21 اقپان كۇنى راستاعان ەدى.
وسىعان بايلانىستى مەملەكەت باسشىسى قاسىم-جومارت توقاەۆ جازۋشىنىڭ وتباسى مەن جاقىن تۋىستارىنا كوڭىل ايتۋ جەدەلحاتىن جىبەردى.
“دۋلات يسابەكۇلى ۇلاعاتتى عۇمىرىن ۇلت ادەبيەتىنە ارناعان، تاعىلىمدى تۋىندىلارىمەن وقىرمان ساناسىنا شامشىراق بولا بىلگەن ناعىز دەگدار تۇلعا ەدى.
حالقىمىزدىڭ رۋحاني الەمىن بايىتۋدا، ۇلتتىق پروزامىزدىڭ كوكجيەگىن كەڭەيتۋدە ايانباي تەر توگىپ، ونەگەلى ءومىر ءسۇردى. قۋاتتى قالامىنان تۋعان سۇبەلى شىعارمالارى، درامالىق ەڭبەكتەرى الەم ساحنالارىن باعىندىرىپ، دۇنيە جۇزىنە كيەلى ءسوز ونەرىمىزدى دارىپتەدى. سوڭىنا ادەبي مول مۇرا قالدىرعان دۋلات يسابەكۇلىنىڭ جارقىن بەينەسى مەن ارداقتى ەسىمى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن”، – دەلىنگەن جەدەلحاتتا.
