مەملەكەت باسشىسىنىڭ وكىمىمەن سايات يسانوۆ قازاقستان قارۋلى كۇشتەرى ارنايى وپەراتسيالار كۇشتەرىنىڭ قولباسشىسى قىزمەتىنە تاعايىندالدى، دەپ حابارلايدى "ادىرنا" ءتىلشىسى.
بۇل تۋرالى اقوردا حابارلادى.
سايات يسانوۆ بۇعان دەيىن قازاقستان رەسپۋبليكاسى قارۋلى كۇشتەرى ارنايى وپەراتسيالار كۇشتەرى قولباسشىسىنىڭ ورىنباسارى، پودپولكوۆنيك قىزمەتىن اتقارعان. سونىمەن قاتار، باق-تا ونىڭ 2025 جىلى رەسپۋبليكالىق جارىستاردى ۇيىمداستىرۋعا جانە ولارعا باس تورەشىلىك ەتۋگە قاتىسقانى تۋرالى اقپارات بار.
ارنايى وپەراتسيالار كۇشتەرىنىڭ قولباسشىلىعى 2022 جىلعى قاڭتاردا پرەزيدەنت جارلىعىمەن قۇرىلعان. ونىڭ نەگىزگى مىندەتتەرى – ەلدىڭ قورعانىس قابىلەتى مەن اسكەري قاۋىپسىزدىگىن قامتاماسىز ەتۋ، تەرروريزمگە قارسى وپەراتسيالارعا قاتىسۋ جانە زاڭسىز قارۋلى قۇرىلىمدارعا قارسى ءىس-قيمىل جاساۋ.
2024 جىلعى قاڭتاردان 2026 جىلعى قازانعا دەيىن بۇل قۇرىلىمدى ايدوس مىرزاحمەتوۆ باسقاردى. 27 قىركۇيەكتە ول قازاقستاننىڭ قورعانىس ءمينيسترى بولىپ تاعايىندالدى. ول بۇل قىزمەتتە داۋرەن قوسانوۆتىڭ ورنىنا كەلدى.
قورعانىس سالاسىندا قىركۇيەك سوڭىندا بولعان قايعىلى وقيعادان سوڭ بىرقاتار كادرلىق وزگەرىس بولدى. 3 قازان كۇنى پرەزيدەنت قاسىم-جومارت توقاەۆ قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى قانىش ابۋباكىروۆتى، قورعانىس ءمينيسترىنىڭ ورىنباسارى الماز جۇماكەەۆتى جانە اسكەري-تەڭىز كۇشتەرىنىڭ باس قولباسشىسى قانات نيازبەكوۆتى قىزمەتتەرىنەن بوساتتى.
كەيىن قانات نيازبەكوۆ كاسپي تەڭىزىندەگى وقۋ-جاتتىعۋ كەزىندە اسكەري قىزمەتشىلەردىڭ قازا تابۋىنا قاتىستى قىلمىستىق ءىس اياسىندا ۇستالىپ، ۋاقىتشا ۇستاۋ يزولياتورىنا قامالدى. بۇعان دەيىن ونىڭ ءبىرىنشى ورىنباسارى دا تەرگەۋگە الىنعان.
بۇدان بولەك، پرەزيدەنت تاپسىرماسىمەن قورعانىس مينيسترلىگىنىڭ قىزمەتىن تەكسەرۋ جونىندەگى كوميسسيا قۇرىلعان. تەكسەرۋدىڭ العاشقى كەزەڭىندە مەملەكەتتىك مۇلىكتى جىمقىرۋى مۇمكىن دەگەن كۇدىك، قىزمەتتىك وكىلەتتىكتى تەرىس پايدالانۋ جانە باسقا دا زاڭبۇزۋشىلىقتار بويىنشا 13 قىلمىستىق ءىس قوزعالعان.
